თამარ ივერი ბიძინა ივანიშვილს ცხოველების მიმართ სისასტიკის ფაქტებზე რეაგირებას სთხოვს

საოპერო მომღერალი თამარ ივერი სოციალურ ქსელში ვრცელ მიმართვას ავრცელებს, სადაც „ქართული ოცნების“ საპატიო თავმჯდომარეს, ბიძინა ივანიშვილს, ქვეყანაში უსახლკარო ცხოველების მიმართ არსებულ მძიმე ვითარებასა და სავარაუდო სადისტურ მოპყრობაზე რეაგირებას სთხოვს.

ივერის განცხადებით, ცხოველთა დამცველები ყოველდღიურად აწყდებიან ქუჩის ძაღლების უკანონო გაქრობისა და განადგურების ფაქტებს. მისი შეფასებით, პრობლემა კრიტიკულ ზღვარს გასცდა და საზოგადოებაში უდიდესი აღშფოთების მუხტი შექმნა. მომღერალი აღნიშნავს, რომ უსახლკარო ცხოველებსაც ისევე სტკივათ და გააჩნიათ მადლიერების გრძნობა, როგორც შინაურ, პრივილეგირებულ გარემოში მყოფ ოთხფეხებს.

„უმორჩილესად გთხოვთ, დადექით გულანთებული და აღშფოთებული ქართველი ცხოველთა მოყვარულების გვერდით. გამოიკვლიეთ, გამოიძიეთ, გამოააშკარავეთ და სამაგალითოდ დასაჯეთ ეს პირსისხლიან ზოოფაშისტთა გუნდი! მოითხოვეთ 24/7 Live ინტერნეტ კამერა ყველა თავშესაფარში, რომ მათი საქმიანობა მართლაც გამჭვირვალე იყოს და ნებისმიერმა მოქალაქემ თვალი ადევნოს ცხოველთა ყოფას. ეს ბევრ ჭუჭყსა და შეკითხვას გააბათილებს“.

მომღერლის თქმით, შექმნილი ვითარებიდან გამოსავლის სახით აუცილებელია აღნიშნული შემთხვევების ობიექტური გამოძიება, დამნაშავეთა სამაგალითო დასჯა და ყველა თავშესაფარში 24-საათიანი ონლაინ ვიდეოკამერების დამონტაჟება, რათა საზოგადოებას ნებისმიერ დროს შეეძლოს ცხოველთა ყოფაზე თვალყურის დევნება.

მიმართვის ბოლოს მომღერალი ხაზს უსვამს საკითხის სოციალურ-პოლიტიკურ მხარესაც და აღნიშნავს, რომ ეს თემა საზოგადოებისთვის უკიდურესად სენსიტიურია, რამაც შესაძლოა მნიშვნელოვანი გავლენა იქონიოს მმართველი გუნდისადმი ამომრჩევლის განწყობაზე.