The Wall Street Journal: ტრამპი ირანის ომში მხარდაჭერის ნაკლებობის გამო ნატოს გარკვეული ქვეყნების დასჯას განიხილავს

ტრამპის ადმინისტრაცია განიხილავს გეგმას ნატოს იმ წევრი ქვეყნების დასასჯელად, რომლებმაც ირანის ომის დროს აშშ-ს დახმარება არ გაუწიეს. ინფორმაციას ამის შესახებ გამოცემა The Wall Street Journal-ი ადმინისტრაციის ოფიციალურ პირებზე დაყრდნობით ავრცელებს.

წინადადება ითვალისწინებს აშშ-ის ჯარების გაყვანას ჩრდილოატლანტიკური ხელშეკრულების ორგანიზაციის იმ წევრი ქვეყნებიდან, რომლებიც ირანის ომში ნაკლებად დამხმარედ მიიჩნევიან, და მათ განთავსებას იმ ქვეყნებში, რომლებიც უფრო მეტად უჭერდნენ მხარს აშშ-ის სამხედრო კამპანიას.

ეს ინიციატივა ბევრად უფრო მსუბუქია პრეზიდენტ ტრამპის ბოლოდროინდელ მუქარებთან შედარებით, რომლებიც ალიანსიდან აშშ-ის სრულ გამოყვანას ეხებოდა - რისი გაკეთებაც მას, კანონის თანახმად, კონგრესის გარეშე არ შეუძლია.

გეგმა, რომელიც ბოლო კვირების განმავლობაში ვრცელდებოდა და რომელმაც ადმინისტრაციის მაღალჩინოსნებს შორის მხარდაჭერა მოიპოვა, ჯერ კიდევ ჩამოყალიბების ადრეულ ეტაპზეა და ერთ-ერთია იმ რამდენიმე ვარიანტიდან, რომლებსაც თეთრი სახლი ნატოს დასასჯელად განიხილავს.

ეს ხაზს უსვამს ტრამპის ადმინისტრაციასა და ევროპელ მოკავშირეებს შორის მზარდ განხეთქილებას, რაც პრეზიდენტის მიერ ირანთან ომის დაწყების გადაწყვეტილებას მოჰყვა.