CNN: აშშ-ის იუსტიციის დეპარტამენტის ზედამხედველობის სამსახური ეპშტეინის ფაილების დამუშავების საკითხს გამოიძიებს

აშშ-ის იუსტიციის დეპარტამენტის შიდა ზედამხედველობის სამსახური იწყებს გამოძიებას დეპარტამენტის მიერ ჯეფრი ეპშტეინთან დაკავშირებული ფაილებისა და დოკუმენტების მომზადების პროცესზე. ინფორმაციას ამის შესახებ ტელეკომპანია CNN-ი ავრცელებს.

გავრცელებულ განცხადებაში ნათქვამია, რომ გენერალური ინსპექტორი ყურადღებას გაამახვილებს „იუსტიციის დეპარტამენტის მიერ შესაბამისი მასალის იდენტიფიცირებაზე, შეგროვებასა და წარდგენაზე“, ასევე „მასალის რედაქტირებისა (დაფარვის) და მისი გასაჯაროებისგან თავის შეკავების პროცესებზე“, და იმაზე, თუ როგორ გადაჭრა დეპარტამენტმა ეპშტეინის დოკუმენტების გამოქვეყნების შემდეგ წამოჭრილი პრობლემები.

გასული წლის ბოლოს მიღებული კანონის საფუძველზე, კონგრესმა ეპშტეინთან დაკავშირებული გამოძიებების ფარგლებში შეგროვებული ვრცელი მასალების გასაჯაროების ბრძანება გასცა.

კონგრესის ზოგიერთმა წევრმა იუსტიციის დეპარტამენტი გააკრიტიკა ტექსტის გადაჭარბებული დაფარვისა და იმის გამო, რომ უწყება თვალს ადევნებდა მათ მიერ მასალების არარედაქტირებული (სრული) ვერსიების გაცნობის პროცესს.