აშშ-ის სამხედრო მაღალჩინოსნები მომავალი წლის ბიუჯეტში ათობით მილიარდი დოლარის გამოყოფას ითხოვენ დრონების, საჰაერო თავდაცვის სისტემებისა და გამანადგურებლებისთვის

აშშ-ის სამხედრო მაღალჩინოსნები მომავალი წლის ბიუჯეტში ათობით მილიარდი დოლარის გამოყოფას ითხოვენ დრონების, საჰაერო თავდაცვის სისტემებისა და გამანადგურებლებისთვის, რომლებიც ირანთან ომში საკვანძო როლს ასრულებენ.

პრეზიდენტ ტრამპის ინიციატივის ფარგლებში, რომელიც 2027 წლის ბიუჯეტში თავდაცვის ხარჯების 1.5 ტრილიონ დოლარამდე გაზრდას ითვალისწინებს, პენტაგონს სურს გაასამმაგოს დრონებისა და შესაბამისი ტექნოლოგიების დაფინანსება 74 მილიარდ დოლამდე.

ასევე, იგეგმება 30 მილიარდი დოლარის ინვესტირება კრიტიკულ საბრძოლო მასალებში, მათ შორის რაკეტსაწინააღმდეგო თავდაცვის სისტემებში, რომელთა მარაგებიც ირანის ომის დროს კრიტიკულად შემცირდა.

სამხედრო მაღალჩინოსნების განცხადებით, ხარჯების ეს გეგმა ახლო აღმოსავლეთში კონფლიქტის დაწყებამდე შემუშავდა. მათ არ უსაუბრიათ იმის შესახებ, თუ რა მოცულობის დამატებით სახსრებს მოითხოვენ უშუალოდ ომისთვის, რაც დაემატება იმ თანხებს, რომლებსაც თეთრი სახლი მომავალი წლის თავდაცვის ბიუჯეტის გასაზრდელად ითხოვს.