გორდულაძე ოპოზიციაზე: ძველი, მოქმედი და ყოფილი ნაცები ცდილობენ დაამტკიცონ, რომ ნაცები არ არიან. სულ რომ მუხლზე ჩოქვით შემოიარონ სვეტიცხოველი, გელათი და ნიკორწმინდამდეც ავიდნენ, მაინც ვერ შეძლებენ საზოგადოების მოტყუებას

სულ რომ მუხლზე ჩოქვით შემოიარონ სვეტიცხოველი, გელათი და ნიკორწმინდამდეც ავიდნენ, მაინც ვერ შეძლებენ საზოგადოების მოტყუებას, - განაცხადა გადაცემაში „იმედი Live” პარლამენტის იურიდიულ საკითხთა კომიტეტის თავმჯდომარე არჩილ გორდულაძემ ოპოზიციაზე საუბრისას.

მისივე თქმით, მხოლოდ „ნაციონალურ მოძრაობას“ შეუძლია საპატრიარქოს და პატრიარქის ლანძღვის შემდეგ ამტკიცონ, რომ მორწმუნეები არიან.

„სულ რომ მუხლზე ჩოქვით შემოიარონ სვეტიცხოველი, გელათი და ნიკორწმინდამდეც რომ ავიდნენ, მაინც ვერ შეძლებენ საზოგადოების მოტყუებას. ნახეს რა, რომ არ გამოდის რასაც ამდენი წლის განმავლობაში ცდილობენ - არ არის შესაძლებელი, რომ ის პატივისცემა, რაც არსებობს ეკლესიის, პატრიარქის მიმართ, ფეხქვეშ იყოს გათელილი, როდესაც ხედავენ, რომ არც ისტორიის გადახაზვა შედეგების მომტანი არ არის, ახლა ცდილობენ საკუთარი თავი წარმოაჩინონ იმად, რაც ბუნებაში არ არიან. წარმოვიდგინოთ, რომ მეგის ქარდავა გამოვიდეს და ადამიანის უფლებებზე დაიწყოს საუბარი, ეს ხომ შეუძლებელია? იგივე წარმატებით შეგვიძლია ვთქვათ, რომ გებელსმა ისაუბროს მედიათავისუფლებაზე“, - განაცხადა გორდულაძემ.

საპარლამენტო უმრავლესობის წევრის თქმით, ოპოზიციას არ შეუძლია დამოუკიდებელი გადაწყვეტილებების მიღება, გარდა იმ შემთხვევებისა, როცა ერთმანეთს ლანძღავენ.

„ახლა ძველი, მოქმედი და ყოფილი ნაცები ცდილობენ დაამტკიცონ, რომ ნაცები არ არიან. როგორ შეიძლება სააკაშვილ-ბოკერია-გვარამიას გაერთიანება არ იყოს ნაცი? ამ პატარა პოლიტიკური ტრიუკებით ცდილობენ საზოგადოება მოატყუონ, რომ იქნებ როგორმე მეთერთმეტე არჩევნებში მაინც ჰქონდეთ რაღაც წარმატების იოტისოდენა შანსი, მაგრამ მეთერთმეტედაც ისევე სახელოვნად დამარცხდებიან, როგორც ათჯერ უკვე დამარცხდნენ“, - განაცხადა იურიდიულ საკითხთა კომიტეტის თავმჯდომარემ.