შარმანაშვილი გვარამიას განცხადებაზე: ანტისახელმწიფოებრივ საქმიანობას უთანხმებენ უცხო ქვეყნის საელჩოს. მოსახლეობამ კიდევ ერთხელ დაინახა, რომ ისინი დასავლეთში მოქმედი რადიკალური ძალების ეგიდით მოქმედებენ

ანტისახელმწიფოებრივ საქმიანობას უთანხმებენ უცხო ქვეყნის საელჩოს და კოორდინაციაც კი დაუწყიათ, - განაცხადა საპარლამენტო უმრავლესობის წევრმა, თავდაცვისა და უსაფრთხოების კომიტეტის თავმჯდომარის პირველმა მოადგილემ თენგიზ შარმანაშვილმა ნიკა გვარამიას განცხადებაზე საუბრისას.

მისი თქმით, ქართველმა ხალხმა კიდევ ერთხელ დაინახა, რომ ოპოზიცია გარედან იმართება.

„უკვე საჯაროდ განაცხადეს, რომ ისინი ერთიანი გეგმით მოქმედებენ. ცნობილი ფრაზაც კი გაახმოვანა გვარამიამ - „გარეთ სანქცია, შიგნით აქცია“. ანუ, ამით თქვა, რომ ჩვენი ერთიანი ამოცანით ვმოქმედებთ. ეს არის სრულიად წარმოუდგენელი. წარმოიდგინეთ, რომ ანტისახელმწიფოებრივ საქმიანობას უთანხმებენ უცხო ქვეყნის საელჩოს და კოორდინაციაც კი დაუწყიათ. საქართველოს მოსახლეობამ კიდევ ერთხელ დაინახა, რომ ისინი დასავლეთში მოქმედი რადიკალური ძალების ეგიდით მოქმედებენ და სამწუხაროდ ამას აღარც მალავენ“, - განაცხადა შარმანაშვილმა.

მესამე დღეა ბრიტანეთის საელჩო „ქრონიკის“ კითხვას არ პასუხობს. კითხვა კი ეხება ნიკა გვარამიას განცხადებას, რომელმაც თქვა, რომ ბრიტანეთის ელჩთან შეხვედრაზე ხელისუფლების სანქცირების თემა განიხილეს.