გიორგი გაბუნია: როდესაც მიგაჩნია, რომ ხოშტარია იქნება, გიგაური, თუ ლომჯარია, არის თურმე, ეროვნული გმირი, ქვეყნის ინტერესების დამცველი და ამ დროს გამოდიხარ და ეკლესიას აყენებ შეურაცხყოფას - რუსეთის აგენტობას აბრალებ, აქ ყველაფერი გასაგებია

ქვეყანაში არიან ადამიანები, რომელთაც სძულთ და პირდაპირ ებრძვიან ჩვენს ეკლესიას. ილაშქრებენ ჩვენი ქვეყნის ინტერესების წინააღმდეგ და მომართული არიან იმისკენ, რომ როგორმე დააზიანონ ჩვენი ქვეყნის ეროვნული ინტერესები, - განაცხადა გადაცემაში „დღის ქრონიკა“ პარლამენტის კულტურის კომიტეტის თავმჯდომარემ და საზოგადოება „ქართულის“ ლიდერმა გიორგი გაბუნიამ.

მისივე თქმით, აღნიშნულს ჩვენი ქვეყანა, საზოგადოება არ დაუშვებს.

„როდესაც შენ მიგაჩნია, რომ ხოშტარია იქნება, გიგაური, თუ ლომჯარია, არის თურმე, ქვეყნის ეროვნული გმირი, მომავლის, ქვეყნის ინტერესების დამცველი და ამ დროს შენ, იგივე ადამიანი გამოდიხარ და უმაღლეს იერარქს, ეკლესიას აყენებ შეურაცხყოფას და რუსეთის აგენტობას აბრალებ, რა თქმა უნდა, აქ ყველაფერი გასაგებია და ამას საზოგადოება ადეკვატურად შეაფასებს“, - განაცხადა გაბუნიამ.

მისივე თქმით, სახელმწიფო ეკლესიის საქმიანობისგან არის გამიჯნული. ეკლესია დამოუკიდებელია და მიაჩნიათ, რომ ეკლესიამ მის გამგებლობაში მიკუთვნებული საკითხები დამოუკიდებლად უნდა გადაწყვიტოს. შესაბამისად, მიესალმებიან ყველა იმ გადაწყვეტილებას, რასაც სინოდი მიიღებს.