„აღდგენილია როგორც ელექტროენერგიის, ასევე ბუნებრივი აირის მიწოდება“ - რა ვითარებაა ამ დროისთვის თელავში

თელავში სტიქიის შედეგების სალიკვიდაციო სამუშაოები მესამე დღეა ინტენსიური რეჟიმით გრძელდება. ქვა-ღორღისგან იწმინდება კავკასიონის ქუჩის მიმდებარე ტერიტორია. თელავის ხევზე კი ნაპირსამაგრ სამუშაოებში ათობით ერთეული მძიმე ტექნიკაა ჩართული. სტიქიის ზონაში მცხოვრებ აბონენტებს და მიმდებარე სოფლებს ბუნებრივი აირი სრულად მიეწოდება. უსაფრთხოების ზომებიდან გამომდინარე, კავკასიონის ქუჩის მოსახლეობას ელექტროენერგია კვლავ შეფერხებით აქვს. წყალმომარაგების გარეშეა დარჩენილი თელავის მუნიციპალიტეტის სოფელი ვარდისუბანი, თუმცა საკოორდინაციო შტაბის გადაწყვეტილებით, ადგილობრივებს წყალს სპეციალური ავზების საშუალებით აწვდიან.

ქალაქის მასშტაბით ყველგან გადაადგილება შესაძლებელია, თუმცა გამონაკლისია ვარდოშვილის ქუჩა, რომელიც მესამე დღეა რისკების გამო, პოლიციამ გადაკეტა და ამ მიმართულებით ავტომობილებით მოძრაობა აკრძალულია. ქუჩა სპეციალისტების დასკვნის შემდეგ გაიხსნება.

„აღდგენილია მთლიანად როგორც ელექტროენერგიის, ასევე ბუნებრივი აირის მიწოდება. რამდენიმე სოფელში სავარგულებია დატბორილი, მოსახლეობას დაუზიანდა ვენახები“, - განაცხადა თელავის მერმა ვაჟა მაღრაძემ.