„ახლა სიკვდილის დრო არ არის. რუსეთის წინააღმდეგ სანქციებია მისაღები“ - გამოცემა AXIOS-ი ავრცელებს ლინდსი გრემის სიკვდილამდე რამდენიმე საათით ადრე ნათქვამ სიტყვებს

სენატორმა ლინდსი გრემმა, რომელიც გასულ შაბათს მოულოდნელად გარდაიცვალა, თავისი სიცოცხლის უკანასკნელი კვირები საუდის არაბეთსა და ისრაელს შორის ურთიერთობათა ნორმალიზების ამბიციური გეგმისთვის ნიადაგის მომზადებას დაუთმო, - წერს ამერიკული გამოცემა AXIOS-ი.

გრემი საუდის არაბეთსა და ისრაელს შორის ურთიერთობათა ნორმალიზებას ახლო აღმოსავლეთში ომისშემდგომი მოწესრიგების მთავარ მონაპოვრად მიიჩნევდა - ისეთად, რომელსაც შეეძლო რეგიონის სახე ფუნდამენტურად შეეცვალა.

გრემის გეგმა ისრაელის ოქტომბრის არჩევნებისა და აშშ-ის შუალედური არჩევნების დასრულების შემდეგ ინტენსიური დიპლომატიური კამპანიის დაწყებას ითვალისწინებდა. მიზანი იანვარში ახალი კონგრესის ფიცის დადებამდე შეთანხმების მიღწევა იყო.

„ბოლო კვირების განმავლობაში გრემმა მითხრა, რომ ინიციატივა უკვე განიხილა ტრამპთან, ისევე როგორც ჯარედ კუშნერთან და სტივ უიტკოფთან, და რომ მათ შეათანხმეს მოქმედებების კოორდინირებულად გაგრძელება“, - წერს AXIOS-ის ჟურნალისტი, ბარაკ რავიდი.

შაბათს ღამით, სატელეფონო საუბრისას, გრემმა ტრამპს დეტალური ინფორმაცია მიაწოდა უკრაინაში თავისი ბოლო ვიზიტისა და რუსეთის წინააღმდეგ სანქციების შესახებ კანონპროექტის შესახებ, რომლის კენჭისყრაც სენატში უახლოეს პერიოდში სურდა.

ტრამპმა გრემს აცნობა, რომ ირანის მიერ ჰორმუზის სრუტეში კომერციულ გემებზე მორიგი თავდასხმის შემდეგ, ირანზე ახალი საჰაერო დარტყმების განსახორციელებლად ემზადებოდა.

პირმა, რომელიც გრემს მალევე ესაუბრა, აღნიშნა, რომ სენატორი თავს შეუძლოდ გრძნობდა. როდესაც მან გრემს დაჟინებით ურჩია, დაუყოვნებლივ მიემართა ექიმისთვის, სენატორმა უპასუხა, რომ ამას კვირა დილით, NBC-ის გადაცემა Meet the Press-ში დაგეგმილი გამოსვლის შემდეგ გააკეთებდა.

შემდეგ გრემმა ხუმრობით დასძინა: „ახლა სიკვდილის დრო არ არის. რუსეთის წინააღმდეგ სანქციებია მისაღები, ირანის საკითხი - მოსაგვარებელი, ხოლო ისრაელსა და საუდის არაბეთს შორის ურთიერთობები - დასალაგებელი“.

რამდენიმე საათში ის გარდაიცვალა.