ალუდა ღუდუშაური: მთელ მსოფლიოში უსაფრთხოების საკითხები წინ არის წამოწეული და ბუნებრივია, რომ სამართალდამცავი უწყებების კიდევ უფრო მეტი კოორდინაცია მათ ეფექტურობას ერთიორად გაზრდის

ვფიქრობ ძალიან საინტერესოა ის ფუნქცია და როლი, რომელიც ბატონ მამუკა მდინარაძეს დაეკისრა, ვგულისხმობ კოორდინაციას. საზოგადოებამ იცის, რომ ამ გამოწვევების ფონზე, მთელ მსოფლიოში არის უსაფრთხოების საკითხები წინ წამოწეული და ბუნებრივია, რომ სამართალდამცავი უწყებების კიდევ უფრო მეტი კოორდინაცია მათ ეფექტურობას ერთიორად გაზრდის, - განაცხადა „დღის ქრონიკაში“ საპარლამენტო უმრავლესობის წევრმა ალუდა ღუდუშაურმა.

მისი თქმით, ოპოზიციის სპეკულაციები ამ თემასთან დაკავშირებით, კომიკურია.

„მინდა გამოვეხმაურო იმ სპეკულაციებს, რომელსაც თვალყურს ვადევნებთ, მართლაც კომიკურია ეს ყველაფერი. მე ბატონ მამუკა მდინარაძეს ვიცნობ ჯერ კიდევ საადვოკატო პერიოდიდან, როდესაც მე თვითონ ადვოკატი გახლდით. ის დაჯილდოებულია იმ უნარებით, რომელიც მას წარმატებას მოუტანს უკვე ახალ თანამდებობაზე. საზოგადოებამ კარგად იხილა ყველა ის ნაბიჯი, რაც მან გადადგა და დარწმუნებული ვარ, რომ ის პოზიცია, რომელიც მას დღეიდან ოფიციალურად აქვს, იქნება წარმატებული, ეფექტური, რაც საბოლოო ჯამში გადაითარგმნება ჩვენი მოქალაქეების საკეთილდღეოდ და ჩვენი ქვეყნის წარმატებაში“, - აღნიშნა ღუდუშაურმა.