ამ წუთებში ნიკა კაპანაძისთვის აღკვეთის ღონისძიების შეფარდებაზე სასამართლო პროცესი ალადაშვილის კლინიკაში იმართება

ამ წუთებში მსჯელობს სასამართლო, ვერაზე მომხდარი შეიარაღებული თავდასხმის ავტორისთვის აღკვეთის ღონისძიების შეფარდებაზე, პროცესი ალადაშვილის კლინიკაში იმართება.

პროკურატურა ნიკა კაპანაძისთვის პატიმრობას ითხოვს. მას 20 წლამდე ან უვადო თავისუფლების აღკვეთა ემუქრება.

ნიკა კაპანაძეს დამამძიმებელ გარემოებაში განზრახ მკვლელობა, მკვლელობის მცდელობა, იარაღის მართლსაწინააღმდეგო ტარება და პოლიციელის სიცოცხლის ხელყოფის მცდელობა ედება ბრალად.

17 წლის მოზარდის მკვლელობისა და 3 ადამიანის დაჭრის საქმეზე ბრალდებული კაპანაძე ალადაშვილის კლინიკაში, ბადრაგის თანხლებით რჩება. დაკავებისას ბრალდებულმა პოლიციას შეიარაღებული წინააღმდეგობა გაუწია, რა დროსაც თითებზე მიიღო დაზიანება.

საქართველოს პროკურატურამ დამამძიმებელ გარემოებებში ჩადენილი განზრახ მკვლელობის, დამამძიმებელ გარემოებებში სამი პირის განზრახ მკვლელობის მცდელობის, პოლიციელზე თავდასხმის მცდელობის და ცეცხლსასროლი იარაღის მართლსაწინააღმდეგო ტარების ფაქტებზე დაკავებულს ბრალდება წარუდგინა.

შინაგან საქმეთა სამინისტროს ინფორმაციით, 22 ივლისს, თბილისში, ცეცხლსასროლი იარაღიდან გასროლით ოთხი პირი დაჭრეს. დაჭრილებს შორის 2 არასრულწლოვანია. სამართალდამცველებმა დამამძიმებელ გარემოებებში ჩადენილი განზრახ მკვლელობის მცდელობის ბრალდებით, ერთი პირი ცხელ კვალზე დააკავეს.