არჩილ გორდულაძე: ის პირები, რომლებიც დანაშაულს ჩაიდენენ, რა თქმა უნდა, მიეცემიან შესაბამის პასუხისგებაში. ზუსტად ეს განასხვავებს „ქართულ ოცნებას“ იმ სისტემური და სისტემატური წამების მანქანის შემქმნელი რეჟიმისგან, რომელსაც წარმოადგენს „ნაციონალური მოძრაობა“

კანონის წინაშე ყველა თანასწორია, შესაბამისი პასუხისმგებლობაც დგება და ზუსტად იგივე მოხდა ამ ფაქტთან დაკავშირებით, მაგრამ პროპაგანდისტულმა „ტვ პირველმა“ ეს ფაქტი საზოგადოებას დაუმალა, - განაცხადა პარლამენტის იურიდიულ საკითხთა კომიტეტის თავმჯდომარე არჩილ გორდულაძემ მოძალადე პოლიციელების შესახებ მანიპულაციური ვიდეოს გავრცელებასთან დაკავშირებით.

მისი თქმით, შსს-ს წინააღმდეგ მიზანმიმართული კამპანია მიმდინარეობს.

„ვხედავთ, რომ მიზანმიმართული კამპანია მიმდინარეობს შსს-ს მიმართ ხალხის ნდობის შესამცირებლად, რომელიც მიმართულია იმისკენ, რომ სამართალდამცავმა ორგანოებმა აღარ გააგრძელონ ქვეყნის სუვერენიტეტისთვისა და ადამიანების სიცოცხლისა და ჯანმრთელობის დასაცავად ზრუნვა. ის პირები, რომლებიც დანაშაულს ჩაიდენენ, რა თქმა უნდა მიეცემიან შესაბამის პასუხისგებაში. ზუსტად ეს განასხვავებს „ქართულ ოცნებას“ იმ სისტემური და სისტემატური წამების მანქანის შემქმნელი რეჟიმისგან, რომელსაც წარმოადგენს „ნაციონალური მოძრაობა“ სხვადასხვა განშტოების სახით და მათი მართული ტელევიზიები“, - განაცხადა გორდულაძემ.

ინფორმაცია, რომელიც „ტვ პირველმა“ გუშინდელ ანონსში დამალა, 23 თებერვალს თავადაც გაავრცელა, რომ ძალადობაში მონაწილე პოლიციელები დააკავეს.

როგორც ცნობილია, პოლიციელების მიერ მოქალაქეებს ცემის შესახებ „ტვ პირველის“ გადაცემის ანონსს გამოეხმაურა შინაგან საქმეთა სამინისტრო, რომელშიც აღნიშნულია, რომ საქმე ეხება 2022 წელს მომხდარ ფაქტს და სამივე პოლიციელი დაკავებულია.

ანონსთან დაკავშირებით განცხადება გაავრცელა საქართველოს პროკურატურამაც.