„არქის“ გენერალური დირექტორი შიო ხეცურიანი Swissôtel Kobuleti Beach Resort-ზე: ეს იქნება გამორჩეული პროექტი არა მხოლოდ აჭარის რეგიონისთვის, არამედ მთელი საქართველოსთვის

„არქის“ გენერალური დირექტორი ქობულეთში ახალი პროექტის - Swissôtel Kobuleti Beach Resort-ის მნიშვნელობაზე საუბრობს.

„ინტეგრირებული იქნება „სუისოტელის“ ხუთვარსკვლავიანი სასტუმრო და რა თქმა უნდა, აქ იქნება დაახლოებით 2000-მდე ბინა. ეს იქნება გამორჩეული პროექტი არა მხოლოდ აჭარის რეგიონისთვის, არამედ მთელი საქართველოსთვის”, - განაცხადა „არქის“ გენერალურმა დირექტორმა შიო ხეცურიანმა.

„ასეთი უნიკალური პროექტი, რომელსაც განვახორციელებთ აქ ჩვენს პარტნიორებთან ერთად, ძალიან მნიშვნელოვანია საქართველოსთვისაც და უცხოელი მომხმარებლისთვისაც - როდესაც ასეთი პროექტი შეიქმნება, უფრო მარტივი იქნება მათ მოზიდვა საქართველოსკენ”, - აღნიშნა „არქის“ თანადამფუძნებელმა მინი ბენიშმა.

Swissôtel Kobuleti Beach Resort-ის მშენებლობის დაწყების ცერემონია გუშინ გაიმართა. „Swissôtel Kobuleti Beach Resort-ის მშენებლობის დაწყება კიდევ ერთხელ ადასტურებს, რომ ჩვენი საინვესტიციო გარემო არის სტაბილური, პროგნოზირებადი და მიმზიდველი ინვესტორებისთვის“, - განაცხადა საქართველოს პრემიერ-მინისტრმა ირაკლი კობახიძემ ცერემონიაზე სიტყვით გამოსვლისას.