აშშ-ის განათლების დეპარტამენტი: მშობელთა უფლებების დარღვევის ფაქტებზე გამოძიება დაიწყო, მიზეზი კი ცნობებია იმის შესახებ, რომ მოსწავლეებს შეხება ჰქონდათ სქესის შეცვლისთვის განკუთვნილ პრეპარატებთან და სექსუალიზებულ სასკოლო აქტივობებთან - დონალდ ტრამპის ხელმძღვანელობით, ჩვენ დავიცავთ მშობლების უფლებებს და სკოლებს პასუხისმგებლობას დავაკისრებთ

აშშ-ის განათლების დეპარტამენტი დენვერის საჯარო სკოლებში მომხდარ ინციდენტს იძიებს. საქმე ეხება მასწავლებელს, რომელსაც ბრალად ედება, რომ სასკოლო დავალების ფარგლებში გოგონებს ერთმანეთის კოცნა აიძულა.

ფედერალური ოფიციალური პირების განცხადებით, გამოძიების მთავარი ყურადღება იმის დადგენაზე იქნება მიმართული, უგულებელყო თუ არა ოლქმა მშობლებისა და მოსწავლეთა მოთხოვნები დავალებისგან გათავისუფლების შესახებ, და იყვნენ თუ არა მშობლები წინასწარ ინფორმირებულნი დავალების შინაარსის თაობაზე.

უწყებას არ დაუსახელებია კონკრეტული სკოლა თუ მასწავლებელი, თუმცა განმარტა, რომ ეს გამოძიება უფრო ფართო ინიციატივის ნაწილია, რომლის მიზანიც მშობელთა უფლებების დაცვა და მოსწავლეებისთვის სექსუალური თუ გენდერული იდენტობის თემების არიდებაა.

დეპარტამენტმა ვაშინგტონის შტატის „ბეთელის“ სასკოლო ოლქის წინააღმდეგ გამოძიების დაწყებაც დააანონსა, სადაც „პრაიდის თვისადმი“ მიძღვნილ გამოფენაზე, წარმოდგენილი იყო ტესტოსტერონის ამპულები.

„ქვეყნის მასშტაბით მიღებული შოკისმომგვრელი ცნობები აჩვენებს, რომ სკოლებში ბავშვებს არასათანადო შინაარსის მასალებთან, გამოკითხვებსა და ღონისძიებებთან უწევთ შეხება. ამ პროცესში კი, როგორც ჩანს, უგულებელყოფილია მშობლების ფუნდამენტური უფლება - წინასწარ გაეცნონ ამგვარ მასალებს და უარი თქვან შვილების მსგავს აქტივობებში მონაწილეობაზე“, - აცხადებს ფედერალური უწყების წარმომადგენელი, ფრენკ მილერი.

„დღეს განათლების დეპარტამენტმა მშობელთა უფლებების დარღვევის ფაქტებზე გამოძიება დაიწყო. მიზეზი გახდა ცნობები იმის შესახებ, რომ მოსწავლეებს შეხება ჰქონდათ სქესის შეცვლისთვის განკუთვნილ პრეპარატებთან და სექსუალიზებულ სასკოლო აქტივობებთან. პრეზიდენტ დონალდ ტრამპის ხელმძღვანელობით, ჩვენ დავიცავთ მშობლების უფლებებს და სკოლებს პასუხისმგებლობას დავაკისრებთ“, - ნათქვამია უწყების განცხადებაში.