აშშ-ის სახელმწიფო დეპარტამენტმა უკრაინისთვის 2,68 მილიარდი დოლარის ღირებულების საჰაერო თავდაცვის სისტემების გაყიდვა დაამტკიცა

აშშ-ის სახელმწიფო დეპარტამენტმა უკრაინისთვის საჰაერო თავდაცვის შესაძლებლობების განვითარების მიზნით საჭირო სისტემებისა და შესაბამისი აღჭურვილობისა და მომსახურების მიყიდვის შესახებ გადაწყვეტილება დაამტკიცა. პაკეტის სავარაუდო ღირებულება 2,68 მილიარდი დოლარია.

სახელმწიფო დეპარტამენტის განცხადებით, თუ შეთანხმება გაფორმდება, უკრაინა შესყიდვას ევროპული ქვეყნების ფინანსური კონტრიბუციებისა და აშშ-ის საგარეო სამხედრო დაფინანსების პროგრამის (FMF) ფარგლებში წინა ადმინისტრაციის პერიოდში გამოყოფილი თანხების კომბინაციით დააფინანსებს.

უკრაინის მთავრობამ მოითხოვა შემდეგი ძირითადი თავდაცვითი აღჭურვილობის კატეგორიაში არ შემავალი სამხედრო პროდუქციისა და შესაბამისი მომსახურების შეძენა: S-300-ის ანალოგის რაკეტები; GAM-67 ტიპის რაკეტები; გაზრდილი მოქმედების რადიუსის მქონე საჰაერო თავდაცვის ლაზერული დამიზნების რაკეტების სისტემები; მობილური გამშვები სისტემების მოდიფიკაციის კომპლექტები; RPS 202-ის რადარები, რომლებიც უპილოტო საფრენი აპარატების საწინააღმდეგო სისტემებისთვის გამოიყენება; გასაშლელი ანძების მისაბმელები, ძირითადი მოდიფიკაციები და ტექნიკური მომსახურება; სათადარიგო ნაწილები, სახარჯი მასალები და აქსესუარები, ასევე შეკეთებისა და დაბრუნების მომსახურება; პროგრამული უზრუნველყოფა და ა.შ.

სახელმწიფო დეპარტამენტის შეფასებით, შემოთავაზებული გაყიდვა ხელს შეუწყობს აშშ-ის საგარეო პოლიტიკისა და ეროვნული უსაფრთხოების მიზნების განხორციელებას, რადგან გააძლიერებს ევროპაში პოლიტიკური და ეკონომიკური პროგრესის ხელშემწყობი პარტნიორი ქვეყნის უსაფრთხოებას.

გარდა ამისა, ვაშინგტონში მიიჩნევენ, რომ შემოთავაზებული შესყიდვა გააუმჯობესებს უკრაინის შესაძლებლობებს მიმდინარე და სამომავლო საფრთხეებთან გასამკლავებლად, მათ შორის თავდაცვისა და რეგიონული უსაფრთხოების ამოცანების შესასრულებლად, უფრო მძლავრი საჰაერო თავდაცვის შესაძლებლობების შექმნის გზით.

სახელმწიფო დეპარტამენტის შეფასებით, უკრაინის შეიარაღებულ ძალებს აღნიშნული აღჭურვილობისა და მომსახურების ინტეგრირებასთან დაკავშირებით სირთულეები არ ექნება, ხოლო აღნიშნული აღჭურვილობისა და მხარდაჭერის შესაძლო გაყიდვა რეგიონში სამხედრო ძალთა არსებულ ძირითად ბალანსს არ შეცვლის.