აშშ-ის თავდაცვის მდივნის მოადგილე: აშშ ევროპისგან საკუთარ კონვენციურ თავდაცვაზე ძირითადი პასუხისმგებლობის აღებასა და უკრაინის მხარდაჭერაში წამყვანი როლის დაკავებას ელის

პოლიტიკის საკითხებში აშშ-ის თავდაცვის მდივნის მოადგილემ, ელბრიჯ კოლბიმ განაცხადა, რომ აშშ ევროპისგან საკუთარ კონვენციურ თავდაცვაზე ძირითადი პასუხისმგებლობის აღებასა და უკრაინის მხარდაჭერაში წამყვანი როლის დაკავებას ელის.

„ჩვენ საკმაოდ საქმიანი განხილვა გვაქვს იმის თაობაზე, თუ როგორ ვითანამშრომლებთ მომავალში იმ პირობებში, როდესაც ევროპა - აშკარად ძალზე მდიდარი კონტინენტი - შეძლებს და საკუთარ თავზე აიღებს კიდეც ძირითად პასუხისმგებლობას თავის ტრადიციულ უსაფრთხოებაზე. ბუნებრივია, აშშ ინარჩუნებს ნატოს ერთგულებასა და ალიანსთან მჭიდრო კავშირს, თუმცა უკრაინის დახმარების პროცესს სათავეში ევროპა უნდა ჩაუდგეს“, - განაცხადა ელბრიჯ კოლბიმ ნატოს შტაბ-ბინაში სიტყვით გამოსვლისას.

მან დაადასტურა, რომ აშშ-მა ევროპელ მოკავშირეებს სპეციალური კითხვარი ნამდვილად გაუგზავნა. ვაშინგტონი ითხოვს კონკრეტულ შეფასებებსა და სამოქმედო გეგმებს იმის თაობაზე, თუ როგორ აპირებს ევროპა ეტაპობრივად გადაიბაროს პასუხისმგებლობა საკუთარ კონვენციურ უსაფრთხოებაზე.

„ჩვენ გვინდოდა, მოკავშირეებს ეს ყველაფერი უშუალოდ წერილობით მიეღოთ, ნატო 3.0-ის კონცეფციის შესაბამისად. ეს გულისხმობს ევროპის წამყვან როლს საკუთარ კონვენციურ უსაფრთხოებაში, თუმცა ამავდროულად იმის გააზრებასაც, თუ დროთა განმავლობაში როგორ ვმართოთ ის უზარმაზარი ინვესტიციები, რომლებსაც პოლონეთი, გერმანია თუ თქვენი ქვეყანა - ნიდერლანდები ახორციელებენ. იმედი გვაქვს, ამ გზას სხვებიც გაჰყვებიან“, - აღნიშნა კოლბიმ ნატოს გენერალურ მდივან მარკ რუტესთან ბრიფინგზე.

„რა თქმა უნდა, ევროპა აშშ-ის სასიცოცხლო ინტერესთა სფეროდ რჩება იმის ფონზეც კი, რომ ჩვენს მთავარ პრიორიტეტად დასავლეთ ნახევარსფერო იკვეთება“, - აღნიშნა მან.