აშშ-ის ცენტრალური სარდლობის მეთაურის განცხადებით, ოპერაციამ „ეპიკური რისხვა“ ირანი დაასუსტა და რეგიონში სამხედრო პარტნიორობა გააძლიერა

აშშ-მა თებერვლის ბოლოს დაიწყო ოპერაცია „ეპიკური რისხვა“ და მას შემდეგ ამერიკულმა სამხედრო ძალებმა, რომლებიც აშშ-ის ცენტრალური სარდლობის (CENTCOM) ოპერაციების ზონაში მოქმედებენ, მნიშვნელოვნად დაასუსტეს ირანის სამხედრო შესაძლებლობები და მისი ძალის პროეცირების უნარი, - განაცხადეს აშშ-ის თავდაცვის უწყების ხელმძღვანელებმა.

აშშ-ის შეიარაღებული ძალების ცენტრალური სარდლობის მეთაური, ადმირალი ბრედ კუპერი ვაშინგტონში სენატის შეიარაღებული ძალების კომიტეტის სხდომაზე გამოვიდა. მოსმენა შეეხებოდა რეგიონში ძალების განლაგებას და სარდლობისთვის 2027 ფისკალური წლის საპრეზიდენტო ბიუჯეტის მოთხოვნას.

„40 დღეზე ნაკლებ დროში CENTCOM-ის ძალებმა ჩვენს სამხედრო მიზნებს მიაღწიეს“, - განაცხადა კუპერმა. „ყველაზე მნიშვნელოვანი კი ისაა, რომ ჩვენ მნიშვნელოვნად შევამცირეთ ირანის შესაძლებლობა, საკუთარი საზღვრების გარეთ ძალა გამოეყენებინა, დამუქრებოდა რეგიონს და ჩვენს ინტერესებს“.

კუპერმა კანონმდებლებს შეახსენა, რომ გასული წლის აპრილსა და ოქტომბერში ირანმა ისრაელის მიმართულებით ასობით რაკეტა გაუშვა. თუმცა, მისი თქმით, აშშ-ის ძალებმა პრაქტიკულად გაანადგურეს ირანის ტრადიციული სარაკეტო შესაძლებლობები და ახლა ისლამურ რესპუბლიკას მსგავსი მასშტაბის თავდასხმის განხორციელება აღარ შეუძლია.

„დღეს ირანს ასეთი მასშტაბისა და ინტენსივობის შეტევის განხორციელება აღარ შეუძლია,“ - თქვა მან. „გარდა ამისა, მისი თავდაცვითი ინდუსტრიული ბაზის 90%-ის განადგურების გამო, ირანი წლების განმავლობაში ვეღარ შეძლებს ამ იარაღის აღდგენას“.

აშშ-ის პრეზიდენტის, დონალდ ტრამპისა და მისი ადმინისტრაციის სხვა წარმომადგენლების განცხადებით, ირანს არასდროს ექნება ბირთვული იარაღი. შესაბამისად, „ეპიკური რისხვის“ სამხედრო მიზნები ამ პოლიტიკის მხარდაჭერაზე იყო ორიენტირებული - მათ შორის ირანის ბალისტიკური სარაკეტო შესაძლებლობების, საზღვაო ძალებისა და იმ ინდუსტრიული ბაზის განადგურებაზე, რომელიც ამ შესაძლებლობების აღდგენას უზრუნველყოფდა. კუპერის თქმით, ეს მიზნები მიღწეულია.

„მათი დრონების, რაკეტებისა და საზღვაო ძალების თავდაცვითი ინდუსტრიული ბაზა 90%-ით განადგურდა; დაახლოებით 10% დარჩათ,“ - განუცხადა მან კანონმდებლებს. „ჩემი სამხედრო შეფასებით, ირანის საზღვაო ძალები აღდგენას ხუთიდან ათ წლამდე ვერ დაიწყებს“.

კუპერის თქმით, ირანი მხოლოდ პირდაპირ საფრთხეს არ წარმოადგენდა. ის ასევე ირიბადაც მოქმედებდა, როგორც ტერორისტული დაჯგუფებების მხარდამჭერი, რომლებიც ირანის ინტერესების სასარგებლოდ ძალადობრივ ქმედებებს ახორციელებდნენ. მისი შეფასებით, ეს საფრთხეც მნიშვნელოვნად შემცირდა.