აშშ-ში ტრამპის გამოსვლების შესახებ წინასწარი ინფორმაციის გამოყენებით ვაჭრობისთვის თეთრი სახლის ყოფილ თანამშრომელი 172 000 დოლარით დააჯარიმეს

აშშ-ის სასაქონლო ფიუჩერსებით ვაჭრობის კომისიამ (CFTC) თეთრი სახლის სუფლიორის ყოფილ ოპერატორს გაბრიელ პერესს 172 539 დოლარის გადახდა დააკისრა. ინფორმაციას Reuters-ი ავრცელებს.

სააგენტოს ცნობით, პერესმა პრეზიდენტ დონალდ ტრამპის გამოსვლების შესახებ წინასწარ მიღებული ინფორმაციის გამოყენებით პროგნოზების ბაზრის პლატფორმაზე უკანონო გარიგებები განახორციელა.

CFTC-თან მიღწეული შეთანხმების ფარგლებში პერესმა უნდა დააბრუნოს 107 539.02 დოლარის უკანონოდ მიღებული მოგება და გადაიხადოს 65 000 დოლარის სამოქალაქო ჯარიმა. მან ასევე თანხმობა განაცხადა, რომ სამი წლის განმავლობაში ვაჭრობაში მონაწილეობას არ მიიღებს და მომავალში აღარ დაარღვევს სასაქონლო ბირჟების შესახებ კანონს.

CFTC-ის ინფორმაციით, პერესი 2025 წლის დეკემბრიდან 2026 წლის თებერვლამდე, როდესაც ის თეთრ სახლში მუშაობდა, სავაჭრო პლატფორმა Kalshi-ზე პრეზიდენტის მიერ კონკრეტული სიტყვებისა და ფრაზების ხსენებასთან დაკავშირებული ფსონები დადო.

CFTC-ის განცხადებით, პერესს ტრამპის გამოსვლებზე მათი საჯაროდ წარმოთქმამდე ჰქონდა წვდომა და მიღებულ არასაჯარო ინფორმაციას პირადი სარგებლისთვის კონტრაქტებით ვაჭრობაში იყენებდა.

უწყების განცხადებით, პერესისთვის დაკისრებული 65 000-დოლარიანი ჯარიმა მნიშვნელოვნად შემცირდა მისი მხრიდან გამოძიებასთან „სამაგალითო თანამშრომლობის“ გამო.