AXIOS: აშშ-ის ოფიციალური პირები მიიჩნევენ, რომ სანქციებმა ირანი შესაძლოა ბომბებზე მეტად დააზიანოს

აშშ-ის პრეზიდენტ დონალდ ტრამპის მიერ ირანის წინააღმდეგ დაწყებულმა ეკონომიკურმა ზეწოლამ გაცილებით ნაკლები ყურადღება მიიპყრო, ვიდრე მისმა დაბომბვის კამპანიამ, თუმცა აშშ-ის მაღალჩინოსნები მიიჩნევენ, რომ საბოლოოდ სწორედ ეკონომიკურმა ზომებმა შესაძლოა თეირანის რეჟიმს უფრო მძიმე დარტყმა მიაყენოს. ინფორმაციას AXIOS-ი ავრცელებს.

აშშ-ის სადაზვერვო მონაცემები და ღია წყაროებში გავრცელებული ცნობები მიუთითებს, რომ ირანში ეკონომიკური კრიზისი ღრმავდება. მათ შორის, ქვეყანაში, რომელიც მსოფლიოში ნავთობის ერთ-ერთი უმსხვილესი მწარმოებელია, საწვავის დეფიციტიც კი შეიქმნა.

„ირანელებს სურთ, შეწყდეს დაბომბვები და მათ ფული სჭირდებათ. თუმცა, პრიორიტეტები თითქმის საპირისპირო თანმიმდევრობითაა. მათ, პირველ რიგში, ფული სჭირდებათ“, - განაცხადა ტრამპის ადმინისტრაციის ერთ-ერთმა მაღალჩინოსანმა.

ტრამპმა, რომელმაც უქმეებზე ირანზე აშშ-ის 13-დღიანი თავდასხმები შეაჩერა, ორშაბათს განაცხადა, რომ თეირანმა შეთანხმების განსახილველად შეხვედრა მოითხოვა.

ირანის საგარეო საქმეთა სამინისტროს სპიკერმა ესმაილ ბაღაეიმ ეს განცხადება უარყო, წერს გამოცემა.

ამასთან, ორივე მხარე შუამავლების მეშვეობით აწარმოებს მოლაპარაკებებს. პროცესში ჩართული არიან ომანი, კატარი და პაკისტანი, რომლებიც ცდილობენ საბრძოლო მოქმედებების შეჩერება ხანგრძლივ ცეცხლის შეწყვეტის ახალ შეთანხმებად გარდაქმნან.

მოლაპარაკებების ერთ-ერთი მთავარი საკითხია წინადადება, რომლის მიხედვითაც ირანსა და ომანს გარკვეული უფლებამოსილება და შესაძლო შემოსავლის წყარო მიეცემათ ჰორმუზის სრუტეში გემების მოძრაობის მართვაში.

ეს მოდელი ეფუძნება იმ თანამშრომლობის ჩარჩოს, რომელსაც მალაიზია, სინგაპური და ინდონეზია მალაკის სრუტესა და სინგაპურის სრუტეში იყენებენ.

„ზოგიერთ ირანელს ეს სურს. სხვებს - არა. სწორედ ეს არის პრობლემის ნაწილი“, - განაცხადა აშშ-ის ადმინისტრაციის მაღალჩინოსანმა.

როგორც AXIOS-ის წერს, ირანი უსაფრთხოების გარანტიებს ითხოვს, რომ შეერთებული შტატები მას კვლავ აღარ დაესხმება თავს. გარდა ამისა, თეირანს სურს ფინანსური შეღავათები - როგორც გაყინულ აქტივებზე წვდომა, ისე აშშ-ის სანქციებისგან გათავისუფლება.

თუმცა, ტრამპი ეწინააღმდეგება ირანისთვის ჯილდოს მიცემას ჰორმუზის სრუტეში ნაოსნობის შეფერხების გამო და მოითხოვს, რომ თეირანმა დარჩენილი ბირთვული მასალები გადასცეს.

აშშ-ის კიდევ ერთმა მაღალჩინოსანმა აღიარა, რომ სანქციებსა და აშშ-ის საზღვაო ბლოკადას უფრო მეტი დრო დასჭირდება თეირანის მოლაპარაკებათა მაგიდასთან მისაყვანად, ვიდრე სრულმასშტაბიან დაბომბვის კამპანიას, რომლის განხორციელების უფლებაც ტრამპს ჯერჯერობით არ მიუცია.

გახანგრძლივებულმა პროცესმა შესაძლოა გაზარდოს „რესპუბლიკელებისთვის“ პოლიტიკური რისკები და აიძულოს ისინი, შუალედური არჩევნების კამპანიის პერიოდში დაიცვან არაპოპულარული ომი და საწვავის გაზრდილი ფასები.