AXIOS: ნეთანიაჰუმ ვენსს ისრაელის მთავრობის მიმართ მისი კრიტიკის გამო დაუპირისპირდა

აშშ-ის ვიცე-პრეზიდენტმა ჯეი დი ვენსმა და ისრაელის პრემიერ-მინისტრმა ბენიამინ ნეთანიაჰუმ სამშაბათს საღამოს ვაშინგტონში გამართულ პირისპირ შეხვედრაზე მათ შორის არსებულ უთანხმოებებზე „პირდაპირი“ საუბარი გამართეს. ინფორმაციას AXIOS-ი ისრაელისა და აშშ-ის ოფიციალურ პირებზე დაყრდნობით ავრცელებს.

გამოცემის ცნობით, ირანთან ომის დაწყებიდან მოყოლებული ვენსი აშშ-ის პრეზიდენტის დონალდ ტრამპის უახლოეს გარემოცვაში ნეთანიაჰუს მიმართ ყველაზე სკეპტიკურად განწყობილი ფიგურა იყო. კონფლიქტის გაჭიანურებასთან ერთად მისი კრიტიკა ისრაელის პრემიერ-მინისტრის მიმართ კიდევ უფრო გამკაცრდა.

ომის მიმდინარეობისას ვენსმა უფრო მნიშვნელოვანი როლი შეასრულა როგორც სამხედრო პოლიტიკის, ისე ირანთან მოლაპარაკებების პროცესში. საბოლოოდ, სწორედ ის გახდა აშშ-სა და ირანს შორის გაფორმებული ურთიერთგაგების მემორანდუმის ერთ-ერთი მთავარი დამცველი. ნეთანიაჰუ ამ შეთანხმებას ეწინააღმდეგებოდა, თუმცა საჯაროდ მის წინააღმდეგ არ გამოსულა, რადგან იმედოვნებდა, რომ ის თავისთავად ჩაიშლებოდა. რამდენიმე კვირის შემდეგ ასეც მოხდა.

AXIOS-ის ინფორმაციით, ორ ლიდერს შორის დაძაბულობა კულისებში უკვე დიდი ხანია გრძელდებოდა. ნეთანიაჰუ უკმაყოფილო იყო ვენსის საჯარო კრიტიკით, ხოლო ვიცე-პრეზიდენტი ისრაელის ლიდერს ადანაშაულებდა, რომ ის ურთიერთგაგების მემორანდუმის წინააღმდეგ ოპოზიციას ახალისებდა და პრეზიდენტ დონალდ ტრამპის მიმართ საკმარისად ლოიალური არ იყო. თავის მხრივ, ნეთანიაჰუ კერძო საუბრებში ვენსის როლსაც აკრიტიკებდა.

ამავე დროს, ვენსი მიიჩნევდა, რომ ნეთანიაჰუ ისრაელსა და აშშ-ში მოქმედ მხარდამჭერი მედიის წარმომადგენლებსა და საკუთარ მოკავშირეებს მის წინააღმდეგ იყენებდა, რათა პოლიტიკური ზიანი მიეყენებინათ.

სამშაბათს Blair House-ში გამართული შეხვედრა ორივე მხარისთვის ურთიერთობების გარკვევისა და დაძაბულობის შემცირების შესაძლებლობა იყო. AXIOS-ის ცნობით, ისრაელის მაღალჩინოსანმა განაცხადა, რომ ნეთანიაჰუმ ვენსთან საუბრისას ისრაელის მთავრობის მიმართ მისი ბოლო პერიოდის კრიტიკა და რესპუბლიკურ პარტიაში ისრაელის მხარდაჭერის საკითხიც განიხილა.

„ეს იყო გულწრფელი და ღია საუბარი“, - განაცხადა ისრაელის ოფიციალურმა პირმა.

ამ შეფასებას ამერიკელი მაღალჩინოსანიც დაეთანხმა. „საუბარი პირდაპირი იყო“, - აღნიშნა მან.