AXIOS: სტივ უიტკოფი და ჯარედ კუშნერი შვეიცარიაში ირანთან მოლაპარაკებებზე მიემგზავრებიან

აშშ-ის პრეზიდენტის დონალდ ტრამპის სპეციალური წარმომადგენელი სტივ უიტკოფი შვეიცარიაში მიემგზავრება, რათა ირანთან ბირთვული მოლაპარაკებების პირველ რაუნდში მიიღოს მონაწილეობა. ინფორმაციას AXIOS-ი აშშ-ის ოფიციალურ პირზე დაყრდნობით ავრცელებს.

წყაროს ცნობით, ტრამპის მეორე სპეცწარმომადგენელი ჯარედ კუშნერი შვეიცარიაში უკვე ჩავიდა.

როგორც გამოცემა იუწყება, მოლაპარაკებები, რომელიც პარასკევს უნდა გამართულიყო, ლიბანში ისრაელსა და დაჯგუფება „ჰეზბოლას“ დაპირისპირების გამო გადაიდო.

შვეიცარიაში ჩასვლას ირანის საგარეო საქმეთა მინისტრი აბას არაღჩიც აპირებს, თუმცა ვითარება, შესაძლოა, კვლავ შეიცვალოს, წერს გამოცემა.

შუამავალი ქვეყნიდან ერთ-ერთი წყაროს ინფორმაციით, არაღჩიმ რამდენიმე თავის კოლეგას განუცხადა, რომ ლიბანში ცეცხლის შეწყვეტია ირანისთვის მნიშვნელოვან წინაპირობას წარმოადგენს.

შუამავალი ქვეყნიდან მეორე წყარო საუბრობს იმაზე, რომ ირანელებმა აცნობეს მათ, რომ მათ ჯერ სურთ ლიბანში ცეცხლის შეწყვეტა იხილონ, ხოლო შემდეგ მოლაპარაკებებზე შვეიცარიაში გაემგზავრონ.

AXIOS-ი აღნიშნავს, რომ შვეიცარიაში ჯერ კიდევ გუშინ კატარის პრემიერ-მინისტრი მოჰამედ ბინ აბდულ რაჰმან ალ-თანი ჩავიდა.

გუშინ შვეიცარიაში ელოდებოდნენ აშშ-ის ვიცე-პრეზიდენტს ჯეი დი ვენსს, თუმცა მან ვიზიტი გადადო. უცნობია, კვლავ განიხილება, თუ არა მისი იქ ჩასვლა.