აზერბაიჯანელი ანალიტიკოსი აჰმად შაჰიდოვი: საქართველო და აზერბაიჯანი ევროპის ენერგო უსაფრთხოებაში საკვანძო სახელმწიფოები არიან. საქართველოს გარეშე, საქართველოს ინფრასტრუქტურისა და პოლიტიკური მხარდაჭერის გარეშე, ეს სისტემა ვერ იმუშავებს
საქართველოსა და აზერბაიჯანს შორის სატრანსპორტო, სარკინიგზო და ენერგეტიკულ სფეროებში თანამშრომლობა მნიშვნელოვნად აძლიერებს შუა დერეფნის როლს და სამხრეთ კავკასიას გლობალური დაკავშირებადობის მნიშვნელოვან ცენტრად აქცევს - ქართველი ანალიტიკოსებთან ერთად ამაზე ღიად საუბრობენ აზერბაიჯანელი ექსპერტებიც.
„ბაქოში გაფორმებული ახალი ხელშეკრულებით სტაბილური ტარიფების შენარჩუნება, როდესაც საქმე ეხება ბუნებრივი აირისა და ელექტროენერგიის ტრანზიტს, ასევე სარკინიგზო გადაზიდვებს, გლობალური მასშტაბით არასტაბილურობისას განსაკუთრებით ყურადსაღებია, სატრანსპორტო ხარჯები მსოფლიო მასშტაბით იზრდება, ასეთ დროს კი სტაბილურობა სტრატეგიული უპირატესობაა“, - ამბობს „იმედის კვირასთან“ პოლიტიკური ანალიტიკოსი და აზერბაიჯანის დემოკრატიისა და ადამიანის უფლებათა ინსტიტუტის თავმჯდომარე, დოქტორი აჰმად შაჰიდოვი.
იგი ასევე აღნიშნავს, რომ რუსეთ - უკრაინის ომის შედეგად სავაჭრო ხაზებზე არსებული გამოწვევების ფონზე, საერთაშორისო თვალსაზრისით ინტერესი ამ დერეფნის მიმართ მეტად გაიზარდა.
„ეს განსაკუთრებით ევროკავშირს ეხება, ისინი დაინტერესებულნი არიან სამხრეთ კავკასიასთან თანამშრომლობით, აზერბაიჯანთან, საქართველოსთან თანამშრომლობით, აზერბაიჯანთან როგორც მწარმოებელთან და საქართველოსთან, როგორც მთავარ ქვეყანასთან რომლის ტერიტორიაზეც გადის ყველა ეს რესურსი“, - განაცხადა აჰმად შაჰიდოვმა.
ანალიტიკოსმა ევროპის ენერგოუსაფრთხოებისთვის აზერბაიჯანისა და საქართველოს მნიშვნელობაზეც გაამახვილა ყურადღება.
„აზერბაიჯანსა და საქართველოში სტაბილურობის გათვალისწინებით, ეს ორი სახელმწიფო ევროპის ენერგო უსაფრთხოებისთვის დიდი მნიშვნელობისაა, სწორედ ენერგო სფეროში თანამშრომლობა იზრდება ყველაზე მეტად, ევროპა ეძებს სტაბილურ და სანდო მიწოდების ხაზებსა და წყაროებს, აზერბაიჯანი იქცა ევროპისთვის ენერგიის მნიშვნელოვან მომმარაგებლად. საქართველო და აზერბაიჯანი ევროპის ენერგო უსაფრთხოებაში საკვანძო სახელმწიფოები არიან. საქართველოს გარეშე, საქართველოს ინფრასტრუქტურის, საქართველოს პოლიტიკური მხარდაჭერის გარეშე, ეს სისტემა ვერ იმუშავებს“, აღნიშნა დოქტორმა აჰმად შაჰიდოვმა.
