BBC: შოტლანდიის პარლამენტმა დამოუკიდებლობის შესახებ მეორე რეფერენდუმის ჩატარებას მხარი დაუჭირა

შოტლანდიის პარლამენტის წევრებმა მხარი დაუჭირეს შოტლანდიის მთავრობის დადგენილების პროექტს წინადადებით მიმართოს დიდი ბრიტანეთის მთავრობას, რათა ლონდონმა დამოუკიდებლობის შესახებ რეფერენდუმის ჩატარების საშუალება მისცეს. ინფორმაციას BBC ავრცელებს.

როგორც BBC აღნიშნავს, რეფერენდუმის ჩასატარებლად ბრიტანეთის მთავრობამ შესაბამისი უფლებამოსილებით შოტლანდიის მთავრობა უნდა აღჭურვოს, თუმცა „ლეიბორისტული“ პარტიის წარმომადგენლებმა უკვე განაცხადეს, რომ ამას არ დათანხმდებიან.

შოტლანდიის პარლამენტის მიერ მიღებულ დადგენილებაში აღნიშნულია, რომ დიდი ბრიტანეთის მთავრობამ შესაბამისი განკარგულება უნდა გამოსცეს, რომელიც შოტლანდიის ეროვნული პარტიის მინისტრებს რეფერენდუმის ჩატარების საშუალებას მისცემს.

მოსალოდნელია, რომ რეფერენდუმის საკითხს შოტლანდიის პირველი მინისტრი ჯონ სვინი დიდი ბრიტანეთის პრემიერ-მინისტრთან კირ სტარმერთან შეხვედრის დროს განიხილავს.

ცნობისთვის, შოტლანდიაში დამოუკიდებლობის შესახებ რეფერენდუმი პირველად 2014 წლის 18 სექტემბერს ჩატარდა. მაშინ დიდი ბრიტანეთიდან შოტლანდიის გამოყოფას 44,7%-მა დაუჭირა მხარი, ხოლო წინააღმდეგი 55,3% იყო.