ბიძინა გიორგობიანი: რუსეთის ფედერაციასთან ერთად ძალიან დიდ საფრთხეს წარმოადგენს ევროკავშირი. რა თქმა უნდა, რუსეთის ფედერაცია უფრო დიდი საშიშროებაა, იმიტომ რომ მას ოკუპირებული აქვს საქართველოს ტერიტორიები

ჩვენ არგუმენტირებულად ვაყალიბებთ იმ აზრს, რომ რუსეთის ფედერაციასთან ერთად ძალიან დიდ საფრთხეს წარმოადგენს ევროკავშირი, - განაცხადა გადაცემაში „ღია ეთერი - დებატები“ „ერთიანი ნეიტრალური საქართველოს“ პოლიტიკურმა მდივანმა ბიძინა გიორგობიანმა.

მისივე თქმით, არსებულ გეოგრაფიულ არეალში, საქართველო უნდა იყოს აბსოლუტურად ნეიტრალური სახელმწიფო, რომელიც იქნება დაცული საკუთარი ნეიტრალიტეტით და არ ვინმეს მიერ.

„ერთმანეთთან მებრძოლი ევროკავშირი და რუსეთის ფედერაცია საქართველოსთვის ორივე წარმოადგენს საშიშროებას. რა თქმა უნდა, რუსეთის ფედერაცია უფრო დიდი საშიშროებაა იმიტომ, რომ მას ოკუპირებული აქვს საქართველოს ტერიტორიები, მაგრამ არანაკლებ საშიშროებას წარმოადგენს საქართველოს ევროკავშირში ინტეგრაცია, ვინაიდან ევროკავშირი სრული სვლით მიექანება რუსეთის ფედერაციას წინააღმდეგ ომში. ჩვენთვის არ აქვს დიდი მნიშვნელობა, აშშ-ს ყოფილი ელჩი კელი დეგნანი ივლის აქ სამთავრობო კორიდორებში, თუ ურსულა ფონ დერ ლაიენი და ვიღაც ევრობიუროკრატები მოუწოდებენ საქართველოს ომში შესვლისკენ. მომავალი დიდი ომის კონტურები, რომელიც ყოველდღიურად იკვეთება, საქართველოსთვის არის დიდი საფრთხის შემცველი. ჩვენ ვამბობთ, რომ ამ გეოგრაფიულ არეალში საქართველო უნდა იყოს აბსოლუტურად ნეიტრალური სახელმწიფო, რომელიც იქნება დაცული საკუთარი ნეიტრალიტეტით და არ ვინმეს მიერ“, - განაცხადა გიორგობიანმა.