Bloomberg: აშშ-ირანის შეთანხმების გაფორმება „დიდი შვიდეულის“ სამიტამდე იგეგმება

ამერიკის შეერთებული შტატები და ირანი შეთანხმების გაფორმებას უახლოვდებიან, რომელიც ჰორმუზის სრუტის გახსნას ითვალისწინებს. ინფორმაციას Bloomberg-ი მაღალი რანგის ოფიციალურ პირებზე დაყრდნობით ავრცელებს.

„დიდ შვიდეულში“ შემავალი ერთ-ერთი ქვეყნის მაღალჩინოსანმა, რომელმაც ანონიმურობის დაცვა მოითხოვა, სააგენტოს განუცხადა, რომ ირანის წარმომადგენლებისგან მიღებული ბოლო სიგნალები შეთანხმების მიღწევის მაღალ ალბათობაზე მიუთითებს.

„დიდი შვიდეულის“ კიდევ ერთი წარმომადგენლის თქმით, სავარაუდოდ, მხარეები საბოლოო შეთანხმებას კი არა, ურთიერთგაგების მემორანდუმს მოაწერენ ხელს, რაც შემდგომი მოლაპარაკებების საფუძველი გახდება.

როგორც Bloomberg-ი აღნიშნავს, „დიდი შვიდეულის“ წლევანდელი სამიტი 15-17 ივნისს საფრანგეთის ალპებში მდებარე ქალაქ ევიანში გაიმართება. ინფორმირებული წყაროების ცნობით, ხელმოწერის შესაძლო ადგილად განიხილება ახლომდებარე შვეიცარიული ქალაქი ჟენევა, სადაც ხელმოწერის ცერემონია, შესაძლოა, უკვე ამ კვირას გაიმართოს.

თუმცა ოფიციალური პირები აღნიშნავენ, რომ ირანს ჯერ ოფიციალურად არ დაუდასტურებია, მზად არის თუ არა ხელმოწერის ცერემონიაში მონაწილეობის მისაღებად. მათი თქმით, თებერვალში დაწყებული ომის შემდეგ თეირანსა და ვაშინგტონს შორის კომუნიკაცია რთულად და ნელი ტემპით მიმდინარეობს.

„დიდი შვიდეულის“ კიდევ ერთმა წარმომადგენელმა დაადასტურა, რომ არსებობს ნიშნები, რომლებიც აშშ-სა და ირანს შორის შეთანხმების მოახლოებაზე მიუთითებს, თუმცა იქვე გააფრთხილა, რომ წარსულშიც არაერთი დიპლომატიური წინსვლა ჩაშლილა.

ირანის საგარეო საქმეთა სამინისტროს წარმომადგენელმა განაცხადა, რომ „ამ საკითხზე საბოლოო გადაწყვეტილებამდე ჯერ არ მისულან“.

ამასთან, მისი თქმით, გარკვეული პროგრესი შეინიშნება იმ კონფლიქტის დასრულების მიმართულებით, რომელმაც ახლო აღმოსავლეთში სერიოზული არასტაბილურობა გამოიწვია და ენერგორესურსებზე ფასების მკვეთრი ზრდა განაპირობა.