Bloomberg: პუტინი ახალი გაზსადენის აშენებაში სი ძინპინის დარწმუნებას მეხუთედ შეეცდება

რუსეთის პრეზიდენტი, ვლადიმერ პუტინი, რომელიც დღეს პეკინში გაემგზავრება, ჩინეთის ლიდერთან, სი ძინპინთან ახალი გაზსადენის მშენებლობის საკითხს განიხილავს. ინფორმაციას Bloomberg-ი ავრცელებს.

სააგენტოს ცნობით, საუბარია გაზსადენ „ციმბირის ძალა - 2“-ზე, რომლის აშენებას რუსეთი მეოთხე წელია გეგმავს. Bloomberg-ის მტკიცებით, ეს პუტინის რიგით მეხუთე მცდელობა იქნება, დაარწმუნოს ჩინური მხარე, რათა მათ გაზსადენის მშენებლობის პროექტი ბოლომდე მიიყვანონ.

სააგენტოს ინფორმაციით, რუსეთი იმედოვნებს, რომ ახლო აღმოსავლეთში კონფლიქტის გამო ენერგეტიკულ ბაზრებზე შექმნილი სერიოზული რყევები ჩინეთს აიძულებენ გაზის ფასის კონტრაქტთან და ახალი გაზსადენის მშენებლობასთან დაკავშირებით მეტი „მოქნილობა“ გამოავლინოს.

ერთ-ერთმა რუსმა ჩინოვნიკმა გამოცემას განუცხადა, რომ ჩინური მხარე მოლაპარაკებების დაჩქარებით დაინტერესებულია, თუმცა თვისებრივი პროგრესი მიღწეული არ არის.

პროგრესი ნებისმიერ შეთანხმებაში ჩინეთის ლიდერზეა დამოკიდებული, წერს Bloomberg-ი.