ბოლნისის მუნიციპალიტეტის მერი, ზამურ ჭითანავა, დაბა კაზრეთის კულტურის სახლის სრული რეაბილიტაციის სამუშაოებს გაეცნო

სარეაბილიტაციო სამუშაოები კულტურის სახლის ორი სართულის, ჯამში 1 100 კვადრატული მეტრის ფართობის, ექსტერიერისა და ინტერიერის სრულ განახლებას, ასევე ეზოს მოპირკეთების სამუშაოებს ითვალისწინებს, - ინფორმაციას ბოლნისის მუნიციპალიტეტის მერია ავრცელებს.

უწყების ცნობით, პროექტის ფარგლებში მოხდება კულტურის სახლში არსებული 300 სტუმარზე გათვლილი საკონცერტო დარბაზის განახლება, სრულად გამოიცვლება დარბაზის სცენა, რომელიც აღიჭურვება გახმოვანების და სხვა საჭირო აპარატურით.

„ამ დროისათვის კაზრეთის კულტურის სახლში 6 სახელოვნებო წრე და სტუდია-ანსამბლი ფუნქციონირებს, რომელიც 180 მოზარდს ემსახურება. 2009 წლიდან აქვე მოქმედებს დაბა კაზრეთის ბიბლიოთეკა, რომელსაც ყოველწლიურად 500-ზე მეტი მკითხველი სტუმრობს.

კულტურის სახლის სარეაბილიტაციო სამუშაოები კომპანია „არემჯის“ დაფინანსებით ხორციელდება, პროექტი 2027 წელს დასრულდება.

მერთან ერთად მიმდინარე პროექტი მერიის სივრცითი მოწყობისა და ინფრასტრუქტურის სამსახურის უფროსმა, გიორგი ღიბრაძემ, განათლების, კულტურისა და სპორტის სამსახურის უფროსმა, კობა ჟღენტმა და ადგილობრივი თვითმმართველობის წარმომადგენლებმა დაათვალიერეს“, - აღნიშნულია გავრცელებულ ინფორმაციაში.