ბრიტანეთის ჯანდაცვის მინისტრმა თანამდებობა დატოვა

დიდი ბრიტანეთის ჯანდაცვის მინისტრმა უეს სთრითინგმა თანამდებობა დატოვა. ინფორმაციას The Guardian-ი ავრცელებს.

გადადგომამდე სთრითინგმა დიდი ბრიტანეთის პრემიერ-მინისტრს კირ სტარმერს წერილი მისწერა და „ლეიბორისტული“ პარტიის ახალი ლიდერის დანიშვნის ინიციატივით მიმართა.

„ახლა უკვე ნათელია, რომ თქვენ მომდევნო საყოველთაო არჩევნებზე „ლეიბორისტულ“ პარტიას აღარ უხელმძღვანელებთ, ხოლო „ლეიბორისტ“ დეპუტატებსა და პარტიის წევრებს სურთ, რომ პოლიტიკური გაერთიანების მომავლის შესახებ დისკუსია იდეების ჭიდილი და არა პიროვნებების, ან ვიწრო ფრაქციული ინტერესების განხილვა იყოს. ის უნდა იყოს ფართო და მასში საუკეთესო სავარაუდო კანდიდატები უნდა მონაწილეობდნენ. მე ასეთ მიდგომას მხარს ვუჭერ და იმედი მაქვს, რომ თქვენც შეუწყობთ ამას ხელს“, - აღნიშნულია წერილში.

როგორც გამოცემა იუწყება, თავად სთრითინგს „ლეიბორისტული“ პარტიის ლიდერის თანამდებობისთვის ბრძოლაში ჩართვა არ სურს. შესაძლოა, ეს იმით იყოს განპირობებული, რომ მას თანამდებობაზე ბრძოლისთვის საჭირო 80 დეპუტატის მხარდაჭერა ჯერ არ აქვს.