Business Insider: დასავლური კომპანიები რიგში დგებიან, რათა საკუთარი იარაღი უკრაინაში გამოსცადონ

სულ უფრო მეტი დასავლური კომპანია ცდილობს საკუთარი იარაღი და სამხედრო ტექნოლოგიები უკრაინაში გამოცადოს. ინფორმაციას Business Insider-ი ავრცელებს.

გამოცემის ცნობით, უკრაინაში დრონები და რადიოელექტრონული ბრძოლის სისტემები საუკეთესო გამოცდას გადიან.

როგორც Business Insider-ი აღნიშნავს, გასული წლის ზაფხულში უკრაინამ პროგრამა Test in Ukraine აამუშავა, რომელიც დასავლურ კომპანიებს უფლებას აძლევს, მიაწოდოს უკრაინას საკუთარი პროდუქცია და ის რეალურ საბრძოლო პირობებში შეამოწმოს.

„ახლა უკრაინაში ათეულობით კომპანია ტესტავს თავის სისტემებს, მათ შორის ბრძოლის ველზე. კომპანიების რიცხვი იზრდება“, - ციტირებს გამოცემა უკრაინის ინოვაციური პლატფორმის Brave1-ის გენერალურ დირექტორს ანდრეი გრიცენიუკს.

როგორც გრიცენიუკმა აღნიშნა, უკრაინა უპილოტო საფრენი ტექნიკის გამოსაცდელ დიდ პოლიგონად იქცა. ერთ-ერთი კომპანია, რომელმაც საკუთარი პროდუქცია უკრაინაში Test in Ukraine პროგრამის ფარგლებში გატესტა, არის ბრიტანული Occam Industries, რომელიც დრონებისთვის ხელოვნურ ინტელექტზე დაყრდნობით პროგრამულ უზრუნველყოფას ქმნის.