ჩინეთის ეროვნული სახალხო კონგრესის მუდმივმოქმედი კომიტეტის თავმჯდომარე: ეროვნული კონგრესი მზად არის საქართველოს პარლამენტთან ერთად იმუშაოს ჩვენი ორი ქვეყნის ლიდერებს შორის მიღწეული მნიშვნელოვანი შეთანხმებების განხორციელებაზე
ჩინეთის სახალხო წარმომადგენელთა ეროვნული კონგრესი მზად არის საქართველოს პარლამენტთან ერთად იმუშაოს ჩვენი ორ ქვეყნის ლიდერებს შორის მიღწეული მნიშვნელოვანი შეთანხმებების განხორციელებაზე, - განაცხადა ეროვნული სახალხო კონგრესის მუდმივმოქმედი კომიტეტის თავმჯდომარემ ჭაო ლეძიმ საქართველოს პარლამენტის თავმჯდომარესთან შეხვედრის შემდეგ.
მისი თქმით, ეროვნული სახალხო კონგრესის მუდმივმოქმედი კომიტეტი მზად არის გააძლიეროს საქართველოსთან ურთიერთობები და კიდევ უფრო გაამდიდროს სტრატეგიული პარტნიორობის შინაარსი.
„დიპლომატიური ურთიერთობების დამყარებიდან გასული 34 წლის განმავლობაში ჩინეთი და საქართველო ყოველთვის ურთიერთპატივისცემისა და ორმხრივი სარგებლის სულისკვეთებით ავითარებდნენ თანამშრომლობას. ბოლო წლებში ორი ქვეყნის ლიდერების სტრატეგიული ხელმძღვანელობის პირობებში ჩინეთმა და საქართველომ დაამყარეს სტრატეგიული პარტნიორობა, რის შედეგადაც ორმხრივი ურთიერთობები განვითარების ახალ ეტაპზე გადავიდა. ჩინეთის სახალხო წარმომადგენელთა ეროვნული კონგრესი მზად არის საქართველოს პარლამენტთან ერთად იმუშაოს ჩვენი ორი ქვეყნის ლიდერებს შორის მიღწეული მნიშვნელოვანი შეთანხმებების განხორციელებაზე. გააგრძელოს ორ ქვეყანას შორის ტრადიციული მეგობრობის განმტკიცება. გააძლიეროს ურთიერთობები და კიდევ უფრო გაამდიდროს ჩვენი სტრატეგიული პარტნიორობის შინაარსი“, - აღნიშნა ჭაო ლეძიმ.
პარლამენტის თავმჯდომარე ჩინეთში, ეროვნული სახალხო კონგრესის მუდმივმოქმედი კომიტეტის თავმჯდომარეს შეხვდა. ასევე, საპარლამენტო დელეგაცია ჩინეთის ეროვნულ სახალხო კონგრესში პოლიტბიუროს მუდმივი კომიტეტის წევრს, ჩინეთის სახალხო პოლიტიკური საკონსულტაციო საბჭოს ეროვნული კომიტეტის თავმჯდომარეს შეხვდა. შალვა პაპუაშვილმა აღნიშნა, რომ ბოლო წლებში საქართველო-ჩინეთის ურთიერთობებმა მნიშვნელოვან პროგრესს მიაღწია, რაც პოლიტიკური დიალოგის, ეკონომიკური თანამშრომლობის, კულტურული გაცვლისა და ხალხთაშორისი ურთიერთობების თანმიმდევრულ გაფართოებაში გამოიხატა.
