CNBC: არაბთა გაერთიანებული საამიროების მიერ ჰორმუზის სრუტის გვერდის ავლით ახალი ნავთობსადენის დაახლოებით 50% აშენებულია

არაბთა გაერთიანებული საამიროების ხელისუფლებამ ჰორმუზის სრუტის გვერდის ავლით ახალი ნავთობსადენის დაახლოებით 50% უკვე ააშენა. ინფორმაციას CNBC აბუ-დაბის სახელმწიფო სანავთობო კომპანიის გენერალურ დირექტორზე სულთან აჰმედ ალ ჯაბერზე დაყრდნობით ავრცელებს.

„დღესდღეობით მსოფლიო ენერგიის უმეტესი ნაწილის ტრანსპორტირება კვლავ ვიწრო ადგილების მეშვეობით ხდება“, - ციტირებს CNBC სულთან აჰმედ ალ ჯაბერს.

მედიის ცნობით, ახალი მილსადენი არაბთა გაერთიანებული საამიროების საექსპორტო სიმძლავრეს გააორმაგებს. ის ნავთობის გადატანას ომანის ყურეში განთავსებული ფუჯეირას პორტიდან ჰორმუზის სრუტის გვერდის ავლით შეძლებს.

არაბთა გაერთიანებულმა საამიროებმა პროექტის რეალიზება ირანთან ომის გამო დააჩქარეს. მოსალოდნელია, რომ მილსადენი ექსპლუატაციაში 2027 წლიდან შევა.

„ეს მხოლოდ ეკონომიკური პრობლემა არ არის“, - განაცხადა ალ ჯაბერმა, ირანის მიერ ჰორმუზის სრუტის ჩაკეტვასთან დაკავშირებით. „სინამდვილეში, ეს ქმნის საშიშს პრეცედენტს, თუ გავითვალისწინებთ იმას, რომ ერთ ქვეყანას მსოფლიოში უმნიშვნელოვანესი საზღვაო გზის მძევლად აყვანა შეუძლია“.