CNN: აშშ-ის წარმომადგენელთა პალატის ზედამხედველობის კომიტეტის ორმა წამყვანმა „დემოკრატმა“ კონგრესმენმა პენტაგონი ირანის ომში მსხვერპლთა აღრიცხვის გამო გააკრიტიკა

აშშ-ის წარმომადგენელთა პალატის ზედამხედველობის კომიტეტის ორმა წამყვანმა „დემოკრატმა“ კონგრესმენმა პენტაგონი ირანის ომში მსხვერპლთა აღრიცხვის გამო გააკრიტიკა. ინფორმაციას ამის შესახებ ტელეკომპანია CNN-ი ავრცელებს.

კანონმდებლებმა თავდაცვის მდივან პიტ ჰეგსეტს სამშაბათს ოფიციალური წერილით მიმართეს, სადაც უწყების მიერ მონაცემების აღრიცხვის არსებული პოლიტიკის მიმართ უკმაყოფილება გამოთქვეს.

კონგრესმენები რობერტ გარსია და სუჰას სუბრამანიამი აცხადებენ, რომ ისინი და კომიტეტის სხვა „დემოკრატი“ წევრები იწყებენ გამოძიებას იმასთან დაკავშირებით, თუ როგორ ასაჯაროებს თავდაცვის უწყება ირანთან მიმდინარე ომში დაღუპული და დაჭრილი ამერიკელი სამხედროების შესახებ მონაცემებს.

მანამდე CNN-იც წერდა, რომ პენტაგონი დაჭრილი ამერიკელი სამხედროების შესახებ მონაცემების გასაჯაროებას აყოვნებდა. შედეგად, ერთადერთ განახლებად წყაროდ თავდაცვის უწყების მსხვერპლთა ანალიზის სისტემა (DCAS) რჩებოდა. მას შემდეგ, რაც ბაზიდან დაღუპულთა და დაჭრილთა ნაწილი დროებით გაქრა, პენტაგონი მედიისა და კანონმდებლების ყურადღების ცენტრში მოექცა.