CNN: ისრაელმა აშშ-ს ირანთან შეთანხმების ტექსტის გაცნობა სთხოვა, თუმცა უარი მიიღო

ისრაელმა აშშ-ს ირანთან შეთანხმების ტექსტის გაცნობა სთხოვა, თუმცა უარი მიიღო - განუცხადა ისრაელურმა წყარომ CNN-ს. შედეგად, აშშ-ის უმნიშვნელოვანესი მოკავშირე ინფორმაციის გარეშე დარჩა იმ შეთანხმების შესახებ, რომელიც უკვე ფართო კრიტიკის საგანია.

წყაროს თქმით, მოთხოვნის უარყოფის ერთ-ერთი მიზეზი გახდა ტრამპის ადმინისტრაციის შიში, რომ პრემიერ-მინისტრი, ბენიამინ ნეთანიაჰუ შეთანხმების დეტალებს მის ოფიციალურად გამოქვეყნებამდე გაასაჯაროებდა.

აღნიშნული მოთხოვნისა და შემდგომი უარის შესახებ ინფორმაცია პირველად ისრაელურმა ტელეარხმა i24 News-მა გაავრცელა. ამერიკელმა მაღალჩინოსანმა გავრცელებულ ცნობას „არაზუსტი“ უწოდა და აღნიშნა, რომ „ამერიკის შეერთებული შტატები მოლაპარაკებების განმავლობაში მჭიდრო კოორდინაციაში რჩებოდა რეგიონულ პარტნიორებთან, მათ შორის ისრაელთან“. CNN-მა კომენტარისთვის ისრაელის პრემიერ-მინისტრის აპარატსაც მიმართა.

ორშაბათს საღამოს ნეთანიაჰუმ პრესკონფერენცია გამართა, სადაც თავის რვაწუთიან შესავალ სიტყვაში შეთანხმებას თითქმის არ შეხებია. მოგვიანებით, დასმულ კითხვაზე პასუხისას, ნეთანიაჰუმ აღნიშნა, რომ ის და პრეზიდენტი დონალდ ტრამპი „ყოველთვის ყველაფერზე ერთ აზრზე არ არიან“.

მან ასევე დასძინა: „ჩვენ ჯერ კიდევ არ ვიცით, როგორი იქნება ეს შეთანხმება“.