დავით ლორთქიფანიძე 2011 წლის 26 მაისზე: პირდაპირი მნიშვნელობით ეს იყო სადამსჯელო ოპერაცია, რომელიც განახორციელა მაშინდელმა სისხლიანმა რეჟიმმა და ეს მიმართული იყო იქითკენ, რომ საპროტესტო მუხტი სისხლში ჩაეხშოთ

პირდაპირი მნიშვნელობით ეს იყო სადამსჯელო ოპერაცია [2011 წლის 26 მაისი], რომელიც განახორციელა მაშინდელმა სისხლიანმა რეჟიმმა და ეს მიმართული იყო იქითკენ, რომ საპროტესტო მუხტი სისხლში ჩაეხშოთ, - განაცხადა გადაცემაში „იმედი Live” მერვე მოწვევის პარლამენტის წევრმა დავით ლორთქიფანიძემ.

მისივე თქმით, ნაციონალების და მათი მხარდამჭერების პრობლემა ის არის, რომ ისინი ქართულ ფენომენს არ იცნობენ.

„ცალსახად ეს იყო სადამსჯელო ოპერაცია [2011 წლის 26 მაისი], რადგან ელემენტარულად მოსახლეობას, რომელიც ნამდვილად მშვიდობიანი აქციის მონაწილეები იყვნენ, არ მისცეს საშუალება რომ რომელიმე მხრიდან გასულიყვნენ, ყველა ქუჩა გადაკეტილი იყო, ადამიანებს გასასვლელი არ ჰქონდა. იმ დღეს იყო საშინელი წვიმა, პირდაპირი მნიშვნელობით ნადირობენ ადამიანებზე, სცემდნენ, შეურაცხყოფას აყენებდნენ. სისხლის მდინარეები მოდიოდა, იქ დანდობაზე ლაპარაკი არ იყო“, - იხსნებს დავით ლორთქიფანიძე.

მისივე თქმით, 2011 წლის 26 მაისის ღამეს რუსთაველიდან განდევნილი ასეულობით დასახიჩრებული ადამიანი რესპუბლიკურ საავადმყოფოში მიჰყავდათ.

„ამას რა შეიძლება დაარქვა თუ არა ქართველი ხალხის დასაშინებლად გადადგმული ნაბიჯი, მაგრამ რაც დაემართათ მაგ ღამის გამოც, გამოჩნდა 2012 წლის არჩევნებზე“, - აღნიშნა ლორთქიფანიძემ.