დავით მათიკაშვილი: რადიკალური ოპოზიციის მიერ დაანონსებული და ვერშემდგარი გადატრიალების შემდგომ, არის მოცემულობა, როდესაც ყველა იმ პირმა, ვინც იძალადა საკუთარ სამშობლოზე, შესაბამისი პასუხი უნდა აგოს კანონის წინაშე

დავით მათიკაშვილი:დავით მათიკაშვილის განცხადებით, 4 ოქტომბრის საქმეზე დაკავებულების მხრიდან თავის მართლების მცდელობა ფიასკოსთვის არის განწირული. პარლამენტის საპროცედურო საკითხთა და წესების კომიტეტის თავმჯდომარე მიიჩნევს, რომ ​საკუთარ ქმედებებზე ყველამ პასუხი უნდა აგოს.

„რადიკალური ოპოზიციის მიერ დაანონსებული და ვერშემდგარი გადატრიალების შემდგომ, რაც 4 ოქტომბერს საზოგადოებამ იხილა, დღეს არის მოცემულობა, როდესაც ყველა იმ პირმა, ვინც იძალადა საკუთარ სამშობლოზე, ვინც მოინდომა ძალადობრივად ხელისუფლების შეცვლა და ამ გზით ჩვენი ქვეყნის ძალიან დიდ უბედურებაში გახვევა, რასაც ჩვენს სახელმწიფოში ომის ქარცეცხლი ჰქვია, შესაბამისი პასუხი უნდა აგოს კანონის წინაშე. ამიტომ, ყველა ის უუნარო მცდელობა გაიმართლონ თავი, ყველაფერი ღობეს დააბრალონ და საზოგადოებას შეასაღონ, თითქოს იქ ძალადობას ადგილი არ ჰქონია, ფიასკოსთვის არის განწირული“, - მიიჩნევს მათიკაშვილი.

4 ოქტომბრის საქმეზე ბრალდებული პოლიტიკოსების: პაატა ბურჭულაძის, მურთაზ ზოდელავას, ირაკლი ნადირაძის, პაატა მანჯგალაძის, ლაშა ბერიძის, ირაკლი შაიშმელაშვილისა და კიდევ ოთხი პირის საქმეზე თბილისის საქალაქო სასამართლოში პროცესი გაიმართება. ბრალდებულები საბოლოო სიტყვის უფლებით ისარგებლებენ.