დავით მათიკაშვილი შსს-ში სპეციალური სამმართველოს შექმნაზე: სიძულვილის ენით გაჯერებული ეთერები, სოცქსელები იყო თავსმოხვეული უცხოეთიდან დაფინანსებული NGO-ებისა და პროპაგანდისტული ტელევიზიების მიერ

პარლამენტის საპროცედურო საკითხთა და წესების კომიტეტის თავმჯდომარე დავით მათიკაშვილი შსს-ში სპეციალური სამმართველოს შექმნასთან დაკავშირებულ გადაწყვეტილებას ეხმაურება.

მისი თქმით, მნიშვნელოვანია, რომ მოხდეს ეფექტური აღსრულება იმ საკანონმდებლო რეგულაციების, რომელიც აქამდეც მოქმედებდა.

„სიძულვილის ენით გაჯერებული ეთერები, სოცქსელები, მცდელობა - ადამიანები ერთმანეთს გადაკიდონ - იყო თავსმოხვეული შეგნებულად, უცხოეთიდან დაფინანსებული NGO-ებისა და პროპაგანდისტული ტელევიზიების მიერ. გვარამიას მაგალითიც საკმარისია, საზოგადოებამ გაიხსენოს, რა მასშტაბის სიძულვილთან გვქონდა და გვაქვს საქმე. ამიტომ ბუნებრივია, ის საკანონმდებლო სივრცე, რომელიც აქამდეც არის შექმნილი, მისი ეფექტური აღსრულება არის სახელმწიფოს პოზიტიური ვალდებულება“, - განაცხადა დავით მათიკაშვილმა.

ცნობისთვის, შსს-ში შეიქმნება სპეციალური სამმართველო, რომლის ძირითადი ფუნქციაც საჯარო სივრცეში სიძულვილის ენის, შეურაცხმყოფელი კამპანიებისა და აგრესიული კომუნიკაციის სისტემური მონიტორინგი და სამართლებრივი რეაგირება იქნება.