დავით მათიკაშვილი ტაჯიკეთში პრემიერის ვიზიტზე: მნიშვნელოვანია საქართველოს, როგორც სატრანზიტო ქვეყნის, „შუა დერეფნის“ ერთ-ერთი გამორჩეული და შეუცვლელი სეგმენტის და ცენტრალური აზიის ქვეყნების ურთიერთკავშირი, რომელთა ნაწილს ზღვაზე გასასვლელი არ აქვს
საქართველოს პრემიერ-მინისტრის ტაჯიკეთში ვიზიტს საპროცედურო საკითხთა და წესების საპარლამენტო კომიტეტის თავმჯდომარე დავით მათიკაშვილი გამოეხმაურა.
როგორც მან „დღის ქრონიკასთან“ აღნიშნა, მსგავსი დონის შეხვედრები მნიშვნელოვანია დაკავშირებადობის და „შუა დერეფნის“ საკითხებზე პოზიციების დაახლოებისთვის.
„საქართველოს, ქართველ ხალხს და ცენტრალური აზიის სახელმწიფოებს და მათ ხალხებს ისტორიულად მეგობრული ურთიერთობა აკავშირებთ. მე ვხელმძღვანელობ როგორც ტაჯიკეთთან, ასევე, ყირგიზეთთან მეგობრობის ჯგუფებს საქართველოს პარლამენტში და მინდა გითხრათ, რომ საკმაოდ აქტიურია ეს ხაზი საპარლამენტო დიპლომატიის. თუმცა, უმაღლეს დონეზე ვიზიტები აქამდე არ განხორციელებულა. სასიხარულოა ის ძალიან მნიშვნელოვანი ვიზიტები - ერთი კვირის წინ ყირგიზეთსა და დღეს ტაჯიკეთში.
რა თქმა უნდა უაღრესად მნიშვნელოვანია დაკავშირებადობის საკითხის ცალსახა, ერთმნიშვნელოვანი გაანალიზება. ასევე, მნიშვნელოვანია საქართველოს, როგორც სატრანზიტო ქვეყნის, „შუა დერეფნის“ ერთ-ერთი გამორჩეული და შეუცვლელი სეგმენტის და ცენტრალური აზიის ქვეყნების ურთიერთკავშირი, რომელთა ნაწილს ზღვაზე არ აქვს გასასვლელი, რომელთაც მუდმივად აქვთ საკუთარი ტვირთების მიღებისა და გაცილების თემატიკა აქტუალური და მნიშვნელოვანი. მით უმეტეს დღეს, როდესაც მსოფლიო პოლიტიკური დაძაბულობის ვითარებაში, გამორჩეულად მნიშვნელოვან როლს იძენს „შუა დერეფანი“, - განაცხადა დავით მათიკაშვილმა.
