დავით სონღულაშვილი: ერეკლე მეფის, დიდი ქართველის, მხედართმთავრის, პოლიტიკოსისა და უდიდესი მოღვაწის დაბადების თარიღის დაზუსტება ჩვენი ისტორიისთვის და ისტორიული მოვლენების სიზუსტისთვის მნიშვნელოვან ნაბიჯს წარმოადგენს
გარემოს დაცვისა და სოფლის მეურნეობის მინისტრი დავით სონღულაშვილი თელავში, მეფე ერეკლე II-ის სასახლეში გამართულ ეროვნულ სამეცნიერო კონფერენციაში „ერეკლე მეორის ბიოგრაფიული შტრიხები: ნარატივი და ისტორიული რეალობა“ მონაწილეობდა.
კონფერენციის მიზანს საზოგადოებისთვის მეფე ერეკლე II-ის დაბადების თარიღის დადგენასთან დაკავშირებული ახალი ისტორიული ფაქტების გაცნობა და შესაბამისი რეზოლუციის მიღება წარმოადგენდა.
მისასალმებელი სიტყვისას, მინისტრმა საქართველოს სახელმწიფოებრიობის განმტკიცების საქმეში ერეკლე II-ის განსაკუთრებულ როლზე გაამახვილა ყურადღება.
„ერეკლე მეფის, დიდი ქართველის, მხედართმთავრის, პოლიტიკოსისა და უდიდესი მოღვაწის დაბადების თარიღის დაზუსტება ჩვენი ისტორიისთვის და ისტორიული მოვლენების სიზუსტისთვის მნიშვნელოვან ნაბიჯს წარმოადგენს“, - განაცხადა დავით სონღულაშვილმა.
კონფერენციის ფარგლებში განხილული იყო ერეკლე II-ის ბიოგრაფიის სხვადასხვა ასპექტი, ისტორიული წყაროების ანალიზი და ბაგრატიონთა დინასტიის საოჯახო არქივები.
სამეცნიერო კონფერენციას საქართველოს მეცნიერების, განათლებისა და ახალგაზრდობის მინისტრი გივი მიქანაძე, საქართველოს კულტურის მინისტრის მოადგილე გიორგი მირცხულავა, კახეთის მხარეში სახელმწიფო რწმუნებული პლატონ კალმახელიძე, აბბა ალავერდელი მიტროპოლიტი მეუფე დავითი, ადგილობრივი თვითმმართველობის და სამეცნიერო წრეების წარმომადგენლები ესწრებოდნენ.
იმედი
წყარო: imedinews.ge