დავით სონღულაშვილი კახეთში სტიქიაზე: მნიშვნელოვანია პირველ რიგში ის, რომ არსებული ინფრასტრუქტურა, რომელიც დაზიანებულია, დროულად იყოს აღდგენილი, რომ ქალაქმა შეძლოს ჩვეულ რეჟიმში ცხოვრების გაგრძელება
აქტიურად მიმდინარეობს ინფრასტრუქტურული სამუშაოების აღდგენითი ღონისძიებები, - განაცხადა გარემოს დაცვის და სოფლის მეურნეობის მინისტრმა დავით სონღულაშვილმა კახეთში, სტიქიის შედეგების დათვალიერების შემდეგ.
მისივე თქმით, ზიანი სოფლის მეურნეობის მიმართულებითაც იქნება შეფასებული.
„მნიშვნელოვანია პირველ რიგში ის, რომ არსებული ინფრასტრუქტურა, რომელიც დაზიანებულია, დროულად იყოს აღდგენილი, რომ ქალაქმა შეძლოს ჩვეულ რეჟიმში ცხოვრების გაგრძელება“, - აღნიშნა დავით სონღულაშვილმა.
„ენერგო პრო ჯორჯიას“ თელავის მუნიციპალიტეტის ხელმძღვანელის, ვასიკო ხუროშვილის განცხადებით კი, თელავში აქტიურად მიმდინარეობს სამუშაოები, რათა მოსახლეობას ელექტროენერგიის მიწოდება აღუდგეთ.
„ამ დროისთვის თელავში, ალაზნის გამზირზე, მოსახლეობის ნაწილს ელექტროენერგიის მიწოდება აღდგენილი აქვს. კავკასიონის მიმართულებით დაზიანებულია ელექტროგადამცემი ხაზები და ელსაყრდენები, რომლებზეც მიმდინარეობს აღდგენითი სამუშაოები და „ენერგო პრო ჯორჯიას“ თელავის სერვისცენტრის ტექნიკური ჯგუფი სრულად მობილიზებულია“, - განაცხადა ვასიკო ხუროშვილმა.
მძიმე ტექნიკა თელავში კავკასიონის ქუჩას ქვა-ღორღისგან წმენდს. ქუჩის გახსნა საღამოსთვის იგეგმება. კალაპოტიდან გადმოსულმა მდინარემ ქალაქის ქუჩები და შენობები დატბორა. მუშაობს სტიქიის სალიკვიდაციო შტაბი, მოგვიანებით მიყენებული ზარალის დათვლა დაიწყება.
სტიქიის შედეგად კახეთში განადგურდა ინფრასტრუქტურა, დანგრეულია ხიდი, დატბორილია საცხოვრებელი კორპუსები, კომერციული და საჯარო შენობები.
