დეკანოზი ალექსანდრე გალდავა ლგბტ პროპაგანდაზე: ითხოვდნენ, რომ მოგვეცით საშუალება უბრალოდ გავივლით, აღლუმსაც არ ჩავატარებთ, უბრალოდ რუსთაველზე გავივლითო. ჩვენ ვეკითხებოდით თქვენი მიზანი ხომ გავლა არ არის, საბოლოოდ თქვენი მიზანი ხომ ქორწინების დაკანონება და ბავშვის აყვანაა - ბავშვის აყვანა საშინელებაა, რადგან ბავშვის უფლებებს არღვევ ამით

ეს ნელ-ნელა მოვიდა. როცა ვხვდებოდით მათ წარმომადგენლებს, მათ ადვოკატებს, მაშინ ისინი ითხოვდნენ, რომ მოგვეცით საშუალება უბრალოდ გავივლით, აღლუმსაც არ ჩავატარებთ, უბრალოდ რუსთაველზე გავივლითო, - განაცხადა გადაცემაში „იმედის კვირა“ თბილისის მთავარანგელოზ მიქაელის სახელობის ტაძრის წინამძღვარმა დეკანოზმა ალექსანდრე გალდავამ საქართველოში ლგბტ პროპაგანდის დამკვიდრების მცდელობაზე საუბრისას.

მისივე თქმით, საპატრიარქოს წარმომადგენლები მათ ეკითხებოდნენ თუ რა იყო ამ ყველაფრის მიზანი, რუსთაველის გამზირზე უბრალოდ გვალა, თუ ერთნაირსქესიანთა ქორწინების დაკანონება და ბავშვების შვილად აყვანის უფლების მოპოვება.

„ჩვენ ვეკითხებოდით თქვენი მიზანი ხომ გავლა არ არის, საბოლოოდ თქვენი მიზანი ხომ ქორწინების დაკანონება და ბავშვის აყვანაა, ეს ხომ საოცრებაა. ორ ადამიანს როგორც უნდა ისე იცხოვროს, მაგრამ ბავშვის აყვანა საშინელებაა, რადგან ბავშვის უფლებებს არღვევ ამით.

ჩვენ არ უნდა გაგვიკვირდეს, რომ ამას გვთხოვენ, ხალხში არასწორადაა გაგებული. ისინი იმას გთხოვენ, რასაც თავის თავს სთხოვენ. რასაც თავის შვილს უსურვებენ, იმას უსურვებენ შენს შვილსაც“, - აღნიშნა დეკანოზმა.

ევროპელ პოლიტიკოსებთან შეხვედრებსა და მათი მხრიდან წამოყენებული მოთხოვნების შესახებ საპატრიარქოს საზოგადოებასთან ურთიერთობის სამსახურის ხელმძღვანელმა ანდრია ჯაღმაიძემ „იმედის კვირისთვის“ მიცემულ ექსკლუზიურ ინტერვიუში გასულ კვირას ისაუბრა.

„ქალბატონი ჰაჯა ლაბიბი მობრძანდა საპატრიარქოში და გაუგონარი რამ გვთხოვა, თქვა, რომ საპატრიარქოს აქვს საკმაოდ დიდი გავლენები საზოგადოებაში, რომ ქართული საზოგადოება 21-ე საუკუნის ტენდენციებს ძალიან ჩამორჩა, მისთვის მიუღებელია ერთნაირსქესიანთა ქორწინებები და ჩვენ გვთხოვა, რომ უნდა დავხმარებოდით ამის პოპულარიზაციაში", - განაცხადა ინტერვიუში ანდრია ჯაღმაიძემ 2023 წელს გამართული შეხვედრის შესახებ.