დეკანოზი ნიკოლოზ ტატუაშვილი: 17 მაისი არის დღე, როდესაც სწორედაც შეგვიძლია, ვთქვათ, რომ გამოგვდის ერთიანობა; ეს არის დღე, როდესაც ერთიანდება მთელი საქართველო, განურჩევლად რელიგიური და ეთნიკური კუთვნილებისა

17 მაისი არის დღე, როდესაც სწორედაც შეგვიძლია, ვთქვათ, რომ გამოგვდის ერთიანობა; ეს არის დღე, როდესაც ერთიანდება მთელი საქართველო, განურჩევლად რელიგიური და ეთნიკური კუთვნილებისა, - განაცხადა „დღის ქრონიკაში“ ჩართვისას დეკანოზმა, ნიკოლოზ ტატუაშვილმა.

მან ისაუბრა, თუ რამდენად აერთიანებს ეს დღე მთელ საზოგადოებას. დეკანოზმა გაიხსენა, თუ როგორ იგლოვა მთელმა საქართველომ პატრიარქი და იმ დღეებში საზოგადოებამ შეძლო გაერთიანება. მისივე თქმით, ოჯახის სიწმინდე არის ისეთი ღირებულება, რომელიც ყველას გვაერთიანებს.

„დავინახეთ, რომ ეს ჩვენ შეგვძლებია. ვფიქრობ, ასეთი დღეა 17 მაისი, როდესაც სწორედაც შეგვიძლია, ვთქვათ, რომ გამოგვდის ერთიანობა. ეს არის დღე, როდესაც ერთიანდება მთელი საქართველო, განურჩევლად რელიგიური და ეთნიკური კუთვნილებისა.

მახსოვს, შარშან რუსთავში ვიყავი ღონისძიებებში ჩართული - მოგეხსენებათ, დიდ ქალაქებშიც აღნიშნავენ ამ დღესასწაულს და ბევრი ეთნიკურად არაქართველი და რელიგიურად სხვა წარმომადგენლები, როგორ ბედნიერები იყვნენ და მათაც როგორ უხაროდათ ეს დღე, რადგან ეს არის არა მხოლოდ რელიგიური და ქრისტიანული, არამედ ზოგადსაკაცობრიო ღირებულება, რომელიც მთელ საქართველოს მოქალაქეებს, მთელ ერს გვაერთიანებს“, - აღნიშნა მამა ნიკოლოზმა.

17 მაისს ოჯახის სიწმინდისა და მშობლების პატივისცემის დღის აღსანიშნავად 10:00 საათზე საყოველთაო შეკრება საქართველოს 10 ქალაქში დაიწყება.

17 მაისს, ოჯახის სიწმინდის დღესთან დაკავშირებით, ქაშუეთის ტაძრიდან სამების ტაძრამდე მსვლელობა გაიმართება.