დიდი ბრიტანეთის პრემიერის განცხადებით, ირლანდიის გაერთიანების საკითხი განხილვას არ ექვემდებარება
გაერთიანებული სამეფოს პრემიერ-მინისტრი ენდი ბერნემი აშშ-ის პრეზიდენტ დონალდ ტრამპის მიერ ირლანდიისა და ჩრდილოეთ ირლანდიის გაერთიანების საკითხთან დაკავშირებით გაკეთებულ განცხადებას გამოეხმაურა.
როგორც ბერნემმა ჟურნალისტებთან აღნიშნა, ის თანამშრომლობაზე დაფუძნებულ მიდგომას აირჩევდა, ხოლო ზოგიერთი საკითხი განხილვას არ ექვემდებარება.
„თანამშრომლობაზე დაფუძნებულ მიდგომას ავირჩევ, თუმცა ზოგიერთი საკითხი დღის წესრიგიდან გამორიცხული იქნება და ეს [ირლანდიის გაერთიანება] სწორედ ერთ-ერთი ასეთი საკითხია.
ვფიქრობ ჩვენი მთავარი მიზანი ადამიანების მაქსიმალურად გაერთიანება უნდა იყოს. ბოლო ათწლეულის განმავლობაში ჩვენ ვიხილეთ Brexit-ის შესახებ რეფერენდუმი, მანამდე კი შოტლანდიის დამოუკიდებლობის საკითხზე რეფერენდუმი.
როგორც ვხედავთ, ასეთი მოვლენების შედეგად წარმოქმნილ განხეთქილებათა მოგვარებას დიდი დრო სჭირდება. ეს კი მნიშვნელოვნად გვხევს უკან და ხელს გვიშლის ყურადღება გავამახვილოთ იმ პრობლემებზე, რომლებიც აქ და ახლა გვაქვს; კერძოდ, ჩრდილოეთ ირლანდიაში ადამიანებისთვის ცხოვრების გაძვირებით გამოწვეულ წნეხსა და იმაზე, რომ ბიუჯეტი დროულად დამტკიცდეს, რათა საჯარო სერვისებმა სათანადოდ ფუნქციონირება შეძლონ.
ეს არის ის საკითხები, რომლებიც ახლა ჩვენ თვალწინაა. ზოგჯერ პოლიტიკოსები იმ საკითხებზე გადადიან, რომელთა დანახვაც თავად სურთ, იმის ნაცვლად, რომ იმ პრობლემების გადაწყვეტაზე იზრუნონ, რომელთა მოგვარებაც საზოგადოებას სჭირდება.
ვფიქრობ, Brexit-ის შესახებ რეფერენდუმიდან ათი წლის თავზე უკვე ზედმეტად ბევრი დაყოფა, კამათი და წარსულზე მუდმივი ფოკუსირება გვქონდა.
ჩვენ აქ და ახლა ჩვენ წინაშე არსებული პრობლემები უნდა მოვაგვაროთ“, - განაცხადა ბერნემმა.
ცნობისათვის, ცოტა ხნის წინ ტრამპმა განაცხადა, რომ სიამოვნებით იხილავდა ირლანდიისა და ჩრდილოეთ ირლანდიის გაერთიანებას.
იმედი
წყარო: imedinews.ge