ეკა სეფაშვილი: ევროკავშირმა რატომ შეწყვიტა დიალოგი მათგან პასუხი არ მაქვს, ჩემი ვარაუდით ეს არის მათი შიში, რომ ოფიციალურ ფორმატში მოისმინონ საქართველოსგან ის არგუმენტები, რომელიც საფუძვლად უდევს მათ მიერ გამოქვეყნებულ ანგარიშებს

ევროკავშირმა რატომ შეწყვიტა დიალოგი მე მათგან ერთმნიშვნელოვანი პასუხი არ მაქვს, მაგრამ ჩემი ვარაუდით ეს არის მათი შიში, რომ ოფიციალურ ფორმატში მოისმინონ საქართველოს მხრიდან ის არგუმენტები და ის ფაქტები, რომელიც საფუძვლად უდევს მათ მიერ გამოქვეყნებულ ანგარიშებს, - განაცხადა გადაცემაში „დღის ქრონიკა“ „ხალხის ძალის“ საერთაშორისო ურთიერთობების მდივანმა, დეპუტატმა ეკა სეფაშვილმა.

მისივე თქმით, აღნიშნული ანგარიშების თანახმად, საქართველო წინ უსწრებს ევროკავშირის დაახლოებით 10 ქვეყანაზე მეტს.

„აღნიშნული ანგარიშების თანახმადაც, ისეთი დემოკრატიული მდგენელების მიხედვით, როგორიცაა სასამართლოსადმი ნდობა, სამოქალაქო უფლებები, პოლიტიკური უფლებები, სიტყვის თავისუფლება, კანონის უზენაესობა, კორუფციის კონტროლი, მთავრობის გამჭვირვალობა, მთავრობის ეფექტიანობა, ეკონომიკური ეფექტიანობა, ეკონომიკური მიღწევები, ამ პარამეტრების მიხედვით, მათივე ანგარიშების მიხედვით საქართველო წინ უსწრებს ევროკავშირის დაახლოებით 10 ქვეყანაზე მეტს.

ამ არგუმენტების მოსმენა არ სურთ ოფიციალურ დონეზე და სწორედ იმიტომ არიდებენ თავს ასეთ ოფიციალურ დიალოგს. როდესაც ისინი ამბობენ, რომ თურმე საქართველოში დემოკრატიული უკუსვლაა და თურმე საქართველომ შეაჩერა ევრო ინტეგრაციის პროცესი, ამაზე მათ არ უნდათ ოფიციალურ დონეზე ღია და ოფიციალურად გაჟღერებული პასუხები. წინააღმდეგ შემთხვევაში ისინი ვეღარ დაგვდებენ ბრალს, ვეღარ შეძლებენ საზოგადოებაში პოლარიზაციის გაღვივებას და ვეღარ შეძლებენ საქართველოს ხელისუფლების რეპუტაციის შელახვას“, - აღნიშნა ეკა სეფაშვილმა.

ეკა სეფაშვილმა ასევე ისაუბრა ევროკავშირის აქართველოს მიმართ მოთხოვნებზე.

„მათი მოთხოვნები დაიყვანება ორ მოთხოვნამდე, ერთი „გამჭვირვალობის კანონის“ უკან გაწვევა და მეორე „ოჯახური ღირებულებების კანონის“ უკან გაწვევა. ერთი ნიშნავს იმას, რომ მოდი ქვეყანაში იყოს შავი ფული და ნუ გააკონტროლებს სახელმწიფო ამ ფულს მაშინ, როდესაც თვითონ აკონტროლებენ და თავის დროზე სხვადასხვა ევროკავშირის ინსტიტუციების საშუალებით თვითონ მოითხოვეს არასამთავრობო ორგანიზაციაში გადარიცხული ფულადი სახსრების კონტროლი და მეორე ეს არის „ოჯახური ღირებულებების“ კანონი, ანუ ფაქტობრივად ეს არის ლგბტ თემის პოპულარიზაციის ხელშეწყობა და სხვა არაფერი.