ესტონეთის პრემიერი კოშტას მცდელობას, რუსეთთან დიალოგი დაამყაროს, მცდარ ნაბიჯს უწოდებს

ევროპული საბჭოს პრეზიდენტის ანტონიუ კოშტას მცდელობამ, კრემლთან არაოფიციალური დიპლომატიური კომუნიკაციის არხების გახსნის მიმართულებით, შესაძლოა, უკრაინისადმი ევროკავშირის მხარდაჭერა დააზიანოს, - განაცხადა ესტონეთის პრემიერ-მინისტრმა კრისტენ მიხალმა.

როგორც გამოცემა POLITICO წერს, ეს კოშტას ინიციატივის მიმართ დღემდე გამოთქმული ერთ-ერთი ყველაზე მკაცრი შეფასებაა.

ბრიუსელში მიმდინარე ლიდერთა სამიტის პირველი დღის დასრულების შემდეგ POLITICO-თან საუბარში მიხალმა აღნიშნა, რომ რუსეთი კვლავ უარს ამბობს მშვიდობისკენ მიმავალ რეალისტურ გზაზე და ხაზგასმით განაცხადა, რომ ნებისმიერი დიპლომატიური პროცესი უკრაინის ხელმძღვანელობით უნდა წარიმართოს.

„ევროკავშირს ამ მოლაპარაკებებში შუამავლის როლის შესრულება არ შეუძლია. იმ მომენტიდან, როდესაც ევროკავშირი ან რომელიმე ცალკეული ქვეყანა თავს შუამავლად წარმოაჩენს, ის საკუთარ შესაძლებლობებს ზღუდავს, მიიღოს ის გადაწყვეტილებები, რომლებიც აუცილებელია უკრაინის მხარდასაჭერად და რუსეთზე ზეწოლის გასაძლიერებლად“, - განაცხადა მიხალმა.

გამოცემის ცნობით, დაპირისპირება მას შემდეგ გამწვავდა, რაც დადასტურდა, რომ კოშტას გავლენიანი ადმინისტრაციის ხელმძღვანელი პედრო ლურტი რუს მაღალჩინოსანს დაუკავშირდა. ამ ნაბიჯმა უკმაყოფილება გამოიწვია იმ ქვეყნებში, რომლებიც აცხადებენ, რომ აღნიშნული ინიციატივის შესახებ წინასწარ ინფორმაცია არ ჰქონდათ.

ევროკავშირის წევრი სახელმწიფოების ნაწილი მიიჩნევს, რომ მოსკოვი აგრესიული პოლიტიკის გაგრძელებას კვლავაც აპირებს, ისევე, როგორც ოთხი წლის წინ, როდესაც უკრაინაში სრულმასშტაბიანი შეჭრა დაიწყო. მათი შეფასებით, ბოლო კვირებში რუსეთმა კიდევ უფრო გააძლიერა სამოქალაქო ობიექტებისა და კრიტიკული ინფრასტრუქტურის განურჩეველი დაბომბვა.

„მოსაზრება, რომ საჭიროა ალტერნატიული არხები ან ფარული დიპლომატიური გზები, მცდარია. მიზანი უცვლელია - ვლადიმირ პუტინმა საბოლოოდ უნდა მიიღოს ის პირობები, რომლებიც ვოლოდიმირ ზელენსკიმ და უკრაინამ წამოაყენეს“, - განაცხადა მიხალმა.