Euronews: საქსონია-ანჰალტში AfD-ის შთამბეჭდავი გამარჯვება, შესაძლოა, იმ პროცესის დასაწყისად იქცეს, როდესაც ულტრამემარჯვენე ძალები ევროპის მასშტაბით ხელისუფლების სათავეში ერთპიროვნულად მოვლენ

საქსონია-ანჰალტში AfD-ის შთამბეჭდავი გამარჯვება, შესაძლოა, იმ პროცესის დასაწყისად იქცეს, როდესაც ულტრამემარჯვენე ძალები ევროპის მასშტაბით ხელისუფლების სათავეში ერთპიროვნულად მოვლენ, - წერს Euronews-ი.

„გერმანიის „დიდი კოალიციის“ მოდელი და ის ცენტრისტული ალიანსი, რომელიც ევროკავშირის პოლიტიკურ სიმტკიცეს უზრუნველყოფდა, რღვევას იწყებს“, - აღნიშნულია სტატიაში.

კვირას AfD-მ გერმანიის აღმოსავლეთ რეგიონში ადგილობრივ არჩევნებში შთამბეჭდავად გაიმარჯვა და ხმათა 43.8% მოიპოვა.

„ნაცისტური ეპოქის შემდეგ პირველად, გერმანიის რეგიონის სათავეში, შესაძლოა, ულტრამემარჯვენე ძალა მოვიდეს: ადგილობრივი ლიდერი ულრიხ ზიგმუნდი შესაძლოა მხარის პრემიერ-მინისტრი გახდეს, თუკი ულტრამემარცხენე პარტია BSW მას მხარს დაუჭერს ან კენჭისყრისას თავის შეკავებას არჩევს“, - აღნიშნულია სტატიაში.

არჩევნების შედეგებს ევროპის მასშტაბით წინააღმდეგობრივი გამოხმაურება მოჰყვა, ხოლო ულტრამემარჯვენე ძალები მზადყოფნას გამოთქვამენ, ეს შედეგები საკუთარი პოლიტიკური დივიდენდებისთვის გამოიყენონ, ვიდრე მომავალ წელს ევროკავშირის საკვანძო სახელმწიფოებში არჩევნები გაიმართება.

მიუხედავად ამისა, ეს შედეგი აუცილებლად გამოიწვევს განგაშის ზარებს მთელ ევროპაში - არა მხოლოდ გერმანიის შიდა პოლიტიკაზე გავლენის გამო, არამედ იმიტომაც, რომ გერმანიის „დიდი კოალიციის“ ტრადიცია ომისშემდგომი ეპოქის უდიდეს ნაწილში იმ პოლიტიკური კონსენსუსის საძირკველს წარმოადგენდა, რომელიც ევროპული ინტეგრაციის გულში დევს.