Financial Times: როგორ შეიძლება ევროკავშირში უკრაინის სწრაფი გაწევრიანების საკითხმა ევროკავშირის ლიდერების სამიტი ორად გაყოს

უკრაინის მცდელობა ევროკავშირში რაც შეიძლება სწრაფად გაწევრიანდეს, შესაძლოა, წევრ სახელმწიფოებს შორის უთანხმოების საგანი გახდეს. ინფორმაციას Financial Times-ი ავრცელებს.

როგორც გამოცემა იუწყება, უკრაინის საკითხზე დღეს ბრიუსელში ევროკავშირის სამიტზე იმსჯელებენ.

„მას შემდეგ, რაც ევროკავშირმა უკრაინასთან წევრობის მოლაპარაკებები ოფიციალურად დაიწყო, სულ სამი დღე გავიდა, თუმცა წევრ სახელმწიფოებს შორის უთანხმოება იმის შესახებ, თუ რამდენად სწრაფად უნდა გაგრძელდეს პროცესი, უკვე საფრთხეს უქმნის მიღწეულ პოზიტიურ განწყობას“, - წერს Financial Times-ი.

გამოცემა მკითხველს შეახსენებს, რომ უკრაინამ ევროკავშირის კანდიდატი ქვეყნის სტატუსი 2022 წლის ივნისში მიიღო, რუსეთის სრულმასშტაბიანი შეჭრიდან ოთხი თვის შემდეგ. დღეს ევროკავშირის მრავალი დედაქალაქი გაფართოებას გეოპოლიტიკურ აუცილებლობად მიიჩნევს, თუმცა ამავე დროს ფრთხილად ეკიდება ნებისმიერ ნაბიჯს, რომელმაც, შესაძლოა, კანდიდატი ქვეყნების გაწევრიანების მკაცრი პროცედურები გაამარტივოს.

ორშაბათს ევროკავშირმა უკრაინასთან მოლაპარაკებების პირველი ე.წ. გაწევრიანების კლასტერი გახსნა. ეს არის თემატური მიმართულებების ჯგუფები, რომელთა ფარგლებში კანდიდატმა ქვეყნებმა საკუთარი კანონმდებლობა ევროკავშირის სტანდარტებს უნდა შეუსაბამონ. პირველი კლასტერი მოიცავს ფუნდამენტურ საკითხებს, მათ შორის სამართლის უზენაესობასა და ადამიანის უფლებებს.

ახლა უკრაინა გერმანიისა და კიდევ რამდენიმე სახელმწიფოს მხარდაჭერით, დანარჩენი ხუთი კლასტერის რაც შეიძლება სწრაფად გახსნას ითხოვს.

„უკრაინისა და მოლდოვისთვის მკაფიოდ ვუჭერთ მხარს მოლაპარაკების ყველა თავის დაუყოვნებლივ გახსნას“, - განაცხადა გერმანიის ერთ-ერთმა ოფიციალურმა პირმა.

Financial Times-ის ცნობით, გაფართოების საკითხებში ევროკომისარი მარტა კოსი ამ კლასტერების გახსნას უკვე მომდევნო თვეში გეგმავს. თუმცა წევრი სახელმწიფოების ნაწილი ამ ვადებს სკეპტიკურად უყურებს. მათი შეშფოთების მიზეზია როგორც გაფართოების მიმართ საზოგადოების შედარებით დაბალი მხარდაჭერა, ისე შიში, რომ უკრაინისთვის პროცესი განსაკუთრებულად დაჩქარებულად აღიქმება.