Financial Times: უიტკოფი და კუშნერი კიევს პირველად ეწვევიან

აშშ-ის პრეზიდენტის დონალდ ტრამპის სპეციალური წარმომადგენელი სტივ უიტკოფი და ბიზნესმენი ჯარედ კუშნერი შეთანხმდნენ, რომ უკრაინაში პირველად ჩავლენ. ინფორმაციას Financial Times-ი ავრცელებს.

გამოცემის ინფორმაციით, ვიზიტი უკრაინაში ომის დასრულებისკენ მიმართული ძალისხმევის ნაწილია. აღნიშნულის შესახებ ჟურნალისტებს თეთრ სახლში გუშინ გამართული ტრამპისა და უკრაინის პრეზიდენტის ვოლოდიმირ ზელენსკის შორის შეხვედრის დეტალებზე ინფორმირებულმა წყაროებმა განუცხადეს.

გამოცემის შეფასებით, ეს მოლაპარაკებები მკვეთრ ცვლილებაზე მიუთითებს იმ დაძაბული ურთიერთობების ფონზე, რომელიც წარსულში ტრამპსა და უკრაინის პრეზიდენტ შორის არსებობდა. ზელენსკი კერძო საუბრებში აღნიშნავს, რომ ტრამპის დამოკიდებულების შეცვლაში გადამწყვეტი როლი მისი მრჩევლების თვეების განმავლობაში მიმდინარე უშუალო კონტაქტებმა ითამაშა.

ორივე პრეზიდენტთან დაახლოებული პირების თქმით, ზელენსკის მთავარი ამოცანა იყო ტრამპის დარწმუნება, რომ უკრაინის მხარდაჭერა აშშ-ის ინტერესებს ემსახურება, ასევე იმაზე აპელირება, რომ ტრამპს წარმატებასთან ასოცირება სურს. მათი თქმით, ბოლო თვეებში ამ არგუმენტმა სულ უფრო მეტი გავლენა მოიპოვა.

ზელენსკის უახლოესმა მრჩევლებმა Financial Times-ს განუცხადეს, რომ უკრაინის პრეზიდენტს ყოველთვის სჯეროდა: ტრამპზე ყველაზე დიდ გავლენას პირისპირ შეხვედრების დროს ახდენდა.

ზელენსკიმ ასევე აღიარა, რამდენად შეიცვალა ორ ლიდერს შორის ურთიერთობა მას შემდეგ, რაც 2025 წლის თებერვალში ოვალურ კაბინეტში მათი შეხვედრა წარუმატებლად დასრულდა. მისი თქმით, ურთიერთობების გაუმჯობესებაში მნიშვნელოვანი როლი შეასრულა შარშან, 26 აპრილს, ვატიკანში, წმინდა პეტრეს ბაზილიკაში, რომის პაპ ფრანცისკეს დაკრძალვაზე გამართულმა ხანმოკლე შეხვედრამ.