Fox News: FBI-მ თეთრი სახლის ეზოში UFC-ის ორთაბრძოლების დროს დაგეგმილი ტერაქტი აღკვეთა

აშშ-ის გამოძიების ფედერალურმა ბიურომ (FBI) და პარტნიორმა უწყებებმა აღკვეთეს სავარაუდო თავდასხმის გეგმა, რომლის სამიზნეც 14 ივნისს ვაშინგტონში დაგეგმილი UFC Freedom 250-ის ღონისძიება უნდა ყოფილიყო. ინფორმაციას Fox News-ი ოფიციალურ პირებზე დაყრდნობით ავრცელებს.

მედიის ინფორმაციით, ორშაბათის მდგომარეობით, დაკავებულია ხუთი პირი, ხოლო გამოძიებამ შესაძლო დანაშაულში ჩართული 23 ადამიანი გამოავლინა.

გამოძიების ვერსიით, თავდამსხმელები ასაფეთქებელი მოწყობილობებით აღჭურვილი დრონების გამოყენებას გეგმავდნენ, რათა ღონისძიების მიმდებარე შენობებზე იერიში მიეტანათ. მათი მიზანი მასობრივი ევაკუაციის გამოწვევა და ხალხის წინასწარ შერჩეული მიმართულებით გაშვება იყო, სადაც, ოფიციალური პირების თქმით, სნაიპერთა ჯგუფი უნდა განეთავსებინათ.

წყაროების ცნობით, ამის შემდეგ დაგეგმილი იყო თავდასხმის „მეორე ტალღა“, რომლის ფარგლებშიც მონაწილეები თეთრი სახლის ჭიშკარზე იერიშის მიტანას აპირებდნენ.

FBI-მ საფრთხის შესახებ ინფორმაცია 10 ივნისს მიიღო და პარტნიორ უწყებებთან ერთად დაიწყო მუშაობა საკმარისი სამართლებრივი საფუძვლის მოსაპოვებლად. შედეგად, ოჰაიოს შტატის ქალაქ ცინცინატიში ერთ-ერთი ეჭვმიტანილი დააკავეს.

აშშ-ის საიდუმლო სამსახური აცხადებს, რომ გამოძიების პროცესში FBI-სთან „მჭიდროდ თანამშრომლობდა“.

„გასული რამდენიმე დღის განმავლობაში ჩვენი სპეციალური აგენტები, ოპერატიული მხარდაჭერის პერსონალი და ტექნიკური უსაფრთხოების ჯგუფები უწყვეტ რეჟიმში მუშაობდნენ, რათა პასუხისმგებელი პირები გამოევლინათ“, - განაცხადა საიდუმლო სამსახურის დირექტორმა შონ კარანმა.