გარდაბანში ილია II-ის მოღვაწეობისადმი მიძღვნილი ღონისძიება გაიმართა

გარდაბნის მუნიციპალიტეტის მერიის ორგანიზებით, გაიმართა ღონისძიება - „ღმერთი, სამშობლო, ადამიანი“, რომელიც სრულიად საქართველოს კათოლიკოს-პატრიარქის, ილია II-ის მრავალწლიან მოღვაწეობას მიეძღვნა.

გარდაბნის მუნიციპალიტეტის მერიის ინფორმაციით, საღამოს ესწრებოდნენ გარდაბნის მუნიციპალიტეტის მერი დავით კარგარეთელი, საკრებულოს თავმჯდომარე მიხეილ გედეხაური, ქვემო ქართლში სახელმწიფო რწმუნებული მოადგილეები იოსებ ალიბეგაშვილი, ავთანდილ ჭრიკიშვილი, ნიკა კობახიძე და ადგილობრივი თვითმმართველობის წარმომადგენლები.

ღონისძიების ფარგლებში მოეწყო თემატური გამოფენა და წარმოდგენილი იყო საარქივო ვიდეომასალა, რომელიც პატრიარქის მოღვაწეობის ისტორიულ ეტაპებსა და გარდაბნის მუნიციპალიტეტთან კავშირს ასახავდა. საღამოს მუსიკალური ნაწილი ანსამბლ „ქართულ ხმებს“ დაეთმო.

მუნიციპალიტეტის მერმა დავით კარგარეთელმა დამსწრე საზოგადოებას სიტყვით მიმართა და ხაზი გაუსვა პატრიარქის მრავალწლიან მსახურებას და იმ განსაკუთრებულ კავშირს, რომელიც უწმინდესს გარდაბნის მუნიციპალიტეტთან აკავშირებს. მერის განცხადებით, პატრიარქის მემკვიდრეობა უმნიშვნელოვანესია ჩვენი ქვეყნის ერთიანობის პროცესში.