გია ვოლსკი: საზოგადოებისთვის მნიშვნელოვანია, რომ ჩვენ არ მოვხვდეთ იმ სიტუაციაში, სადაც სხვა სახელი არ გვერქმევა, თუ არა საზარბაზნე ხორცი

საზოგადოებისთვის მნიშვნელოვანია, რომ ჩვენ არ მოვხვდეთ იმ სიტუაციაში, სადაც სხვა სახელი არ გვერქმევა, თუ არა საზარბაზნე ხორცი, - განაცხადა პარლამენტის პირველმა ვიცე-სპიკერმა გია ვოლსკიმ გადაცემაში „დღის ქრონიკა" ევროკავშირის მხრიდან საქართველოსთვის ვიზალიბერალიზაციის შეწყვეტით მანიპულირების მიზეზებსა და შედეგებზე საუბრისას.

როგორც ვოლსკიმ აღნიშნა, უკრაინა არის ნათელი მაგალითი იმისა, თუ რა შეიძლება მოხდეს იმ შემთხვევაში, თუ ქვეყანა მხოლოდ ევროკავშირის წესებსა და პირობებს მოერგება.

„ევრობიუროკრატები კარგად აფასებენ, რომ საზოგადოებისთვის არჩევანი, რომ დაისჯებით თუკი არ დაგვმორჩილდებით, საკმაოდ ნათელ პერსპექტივას ხატავს. ყველა კარტი გაიხსნა პრაქტიკულად. საზოგადოებისთვის მნიშვნელოვანია, რომ ჩვენ არ მოვხვდეთ იმ სიტუაციაში, სადაც სხვა სახელი არ გვერქმევა, თუ არა საზარბაზნე ხორცი. მიჭირს ამის თქმა, მაგრამ ასეა, რომ სისხლსა და ცრემლში ჩაძირული უკრაინა არის ამის ნათელი მაგალითი. რა ინტერესები შეიძლება ჰქონოდა უკრაინას, როცა მოლაპარაკებები მიდიოდა და რა ვითარებაში აღმოჩნდა, როცა ამ მოლაპარაკებების წარმართვა აუკრძალეს, რაც თვითონვე განუცხადეს ხალხის წინაშე", - აღნიშნა ვოლსკიმ.

დეპუტატის თქმით, ევროკავშირს არ აწყობს საქართველოსთვის ვიზალიბერალიზაციის შეწყვეტა, რადგან ის, რაც ამას მოჰყვება, სასწორის ბევრად უფრო მძიმე მხარეა, ვიდრე მეორე ნაწილი.

„გლობალურ ჭრილში კი, ევროკავშირს აშშ-თან არ აქვს ახლა ფიანდაზად გაფენილი სასიარულო გზა. ეს საკმაოდ სერიოზული სტრატეგიული დაპირისპირებაა გავლენების მიმართულებით. სამხრეთ კავკასია მნიშვნელოვანია. სომხეთთან გამოხატეს მხარდაჭერა, მაგრამ ამ სომხეთს გვერდით მეზობელ საქართველოს თუ მიუგდებენ საჯიჯგნად საოკუპაციო ძალას, მაშინ როცა სომხეთ-საქართველოს შორის არსებობს რაღაც ეკონომიკური ურთიერთობები და თუ დაუთმობენ საქართველოს მხოლოდ ჩინეთს და არა ჩინეთი-ევროპა-ევროკავშირს, ეს არ აწყობთ. ასე რომ ფეხის ამოკვეთა საქართველოდან ძალიან ბუნდოვანი პერსპექტივით, რომ სამაგათე მარიონეტული ხელისუფლება მოვა, მათთვის სერიოზულ პრობლემას შექმნის", - აღნიშნა ვოლსკიმ.